Bu ölkədə baş verən nümayişlərdə 261 nəfər ölüb

Mozambikdə oktyabr ayında ölkə rəhbəri postuna seçilən Daniel Çaponun prezidentliyinə etiraz olaraq keçirilən və tez-tez qarşıdurmaya çevrilən nümayişlərdə ölənlərin sayı 261-ə çatıb.

Publika.az xəbər verir ki, Konstitusiya Məhkəməsinin bazar ertəsi Çaponun seçkilərdəki qələbəsini təsdiqləməsi hadisələrin şiddətlənməsinə səbəb olub.

Qeyd edək ki, həyatını itirənlərdən 134 nəfəri həftə ərzində baş verən hadisələrin qurbanı olub.

Daniel Çapo bazar ertəsindən bəri dağıdıcı şəhər iğtişaşları ilə sarsılan Cənubi Afrika ölkəsini zorakılığa son qoymağa çağırıb. Çapo yarım əsrdir hakimiyyətdə olan Mozambik Azadlıq Cəbhəsi Frelimonun namizədi idi.

Çapo həftənin əvvəlindən bəri bir çox böyük şəhərlərdə müşahidə edilən zorakılıq, ictimai və şəxsi mülklərin dağıdılması, vətəndaşların ölümləri, yolların bağlanması, talan və oğurluq hallarından təəssüfləndiyini bildirib.

47 yaşlı Daniel Çaponun sözlərinə görə, ən çox zərər çəkmiş şəhərlər paytaxt Maputo və onun qonşusu Matola, həmçinin Beyra və Nampula olub.

Aysel Şahmar