Bu ölkə QORXU İÇİNDƏ - Tramp Nobel Sülh Mükafatını qazanmasa...

Norveç ABŞ lideri Donald Trampın Nobel Sülh Mükafatını qazanmayacağı təqdirdə potensial cavab tədbirləri ilə bağlı narahatlığını ifadə edir.

Publika.az xəbər verir ki, bu barədə “Bloomberg” məlumatlı mənbələrə istinadla məlumat yayıb.

Agentliyin məlumatına görə, qalibin oktyabrın 10-da elan olunması ərəfəsində Trampın aqressiv kampaniyası son vaxtlar daha da güclənib. Prezidentin əvvəllər də dediyi kimi, çoxları onun Nobel Sülh Mükafatına layiq olduğuna inanır.

Tramp 2020-ci ildə İsraillə bir sıra ərəb dövlətləri arasında diplomatik əlaqələrin normallaşdırılmasına dair razılaşmaya görə o və ABŞ-ın layiq olduqları krediti almadıqlarını vurğulayıb.

Bundan əlavə, Ağ Evə qayıtdıqdan sonra o, ən azı altı hərbi münaqişənin başa çatdığını elan edib.

Sentyabrın 30-da o, mükafatı alacağını gözləmədiyini söyləyib və bunun çox güman ki, "heç bir şey etməyən bir adama" veriləcəyini qeyd edib. Tramp hesab edir ki, belə bir nəticə ABŞ üçün "ağır təhqir" olacaq.

Məsələ ilə tanış olan rəsmilərin sözlərinə görə, Trampın xüsusi nümayəndəsi Stiv Uitkoff avropalı həmkarları ilə şəxsi söhbətlərində Trampın Nobel mükafatına namizədliyi mövzusunu qaldırıb. ABŞ dövlət katibi Marko Rubio da vaxtaşırı Trampın namizədliyini dəstəklədiyini bildirib.

Bundan əlavə, "Bloomberg" yazır ki, "Pfizer Inc." əczaçılıq korporasiyasının baş direktoru Albert Bourla Trampın ABŞ-da "COVID-19" peyvəndi hazırlamaq səylərini "Nobel Sülh Mükafatına layiq" adlandıraraq işə qarışıb.

Norveç Nobel İnstitutunun rəhbəri Kristian Berg Harpviken deyib ki, Norveç Nobel Komitəsi “birbaşa siyasi təzyiq altında deyil, lakin aydındır ki, həm dövlət, həm də özəl bir sıra kampaniyalar aparılır”. O, Trampın adını çəkməyib.

Agentlik yazır ki, Norveç parlamentinin təyin etdiyi beş nəfərdən ibarət komitənin qərarı 50 il müddətində məxfi saxlanılır, ona görə də oktyabrın 10-da Tramp qalib elan edilməsə, tarixçilər onun hətta 2025-ci il siyahısında olub-olmadığını öyrənmək üçün yarım əsr gözləməli olacaqlar.

Amerika Prezidentinin mükafatı almaması halında mümkün reaksiya ilə bağlı suala adının açıqlanmasını istəməyən yüksək vəzifəli məmurlardan biri zarafat edib ki, o, oktyabrın 10-da xəstəlik məzuniyyəti almağı düşünür.

"Bloomberg"in məlumatına görə, 2010-cu il Nobel Sülh Mükafatı mərasimindən əvvəl Norveç Komitəsi Çindən mükafatın çinli dissidentə verilməsinin nəticələri ilə bağlı xəbərdarlıqlar alıb. Təhdidlərə baxmayaraq, komitə mükafatı sonradan həbsxanada dünyasını dəyişən Liu Xiaoboya verib. Buna cavab olaraq Pekin diplomatik əlaqələri və azad ticarət danışıqlarını dondurub. Diplomatik münasibətlər yalnız 2016-cı ildə bərpa edilib. Sentyabrın sonunda ukraynalı parlamentarilər Trampın Nobel mükafatına namizədliyini irəli sürüblər və müvafiq namizədlik təşəbbüsü Ali Radaya təqdim olunub.

Ukraynadan əvvəl bir neçə ölkənin, o cümlədən İsrail, Pakistan, Kamboca, Qabon, Ruanda, Ermənistan və Azərbaycan rəsmiləri Trampın Nobel Sülh Mükafatına namizədliyini irəli sürməyi təklif etmişdilər. Amerika lideri müxtəlif dərəcədə bu ölkələrin bir sıralarında münaqişələrin həllinə töhfə verib və ya kömək etməyə çalışır.

Trampın özü də dəfələrlə “yeddi müharibəyə” son verdiyini deyib. "Dagens Næringsliv"in yazdığına görə, o, NATO-nun keçmiş baş katibi, hazırda Norveçin maliyyə naziri olan Yens Stoltenberq ilə əlaqə saxlayıb (bu ölkədə Nobel Komitəsi yerləşir) və sülh üzrə Nobel mükafatı ilə bağlı məsələlərlə maraqlanıb.

Hüseyn İbadlı