Ərdoğan Trampla telefon danışığının detallarını açıqladı: Həll olunacaq

Türkiyə prezidenti Rəcəb Tayyib Ərdoğan Azərbaycandan qayıdarkən bir neçə gün əvvəl ABŞ prezidenti Donalda Trampla gerçəkləşdirdiyi telefon danışığının təfərrüatını mətbuata açıqlayıb.

Publika.az xəbər verir ki, prezidentin sözlərinə görə, Türkiyə və ABŞ hər sahədə olduğu kimi müdafiə sənayesində də güclü əməkdaşlıq edir.

O qeyd edib ki, Türkiyə bu münasibətləri inkişaf etdirmək və müsbət nəticələr əldə etmək üçün ABŞ-la danışıqlar aparır:

“Trampla baş tutan telefon danışığında bu istiqamətdə müsbət mesajlar aldıq. F-35 məsələsini açıq şəkildə gündəmə gətirdik. Üstəlik, Türkiyə bu layihədə tərəfdaşdır, onun pulunu ödəyib və üzərinə düşən öhdəlikləri yerinə yetirib. Bizi bu proqramdan çıxarmağın səbəblərinin heç bir qanuniliyi yoxdur. Tramp da bunu əvvəllər dolayısı ilə bəyan edib.

Bütün səviyyələrdə konkret addımların atılması üçün lazımi texniki müzakirələr aparılır. Ümid edirik ki, son nəticədə həm F-35 problemi həll olunacaq, həm də CAATSA (ABŞ-ın sanksiyalar vasitəsilə düşmənlərə qarşı mübarizə qanunu) sanksiyalar aradan qaldırılacaq. Biz buna nail olmalıyıq. Səfərimiz Türkiyə-ABŞ münasibətlərində yeni dövr açdı və aramızdakı dialoqu və dostluğu daha da gücləndirdi”.

Roza Şəfiyeva