İsrail bunu “tarixdə ilk” adlandırdı - Türkiyənin dünyaya meydan oxuyan silahı

Türkiyənin müdafiə sahəsindəki son uğuru İsrail mətbuatında böyük ajiotaj yaradıb.

Publika.az xəbər verir ki, İsrailin "Maariv" qəzeti Türkiyənin qabaqcıl pilotsuz uçuş aparatları və yüksək texnologiyalı sursatlarla təchiz olunmuş gücünə diqqət çəkib.

Xəbərdə bildirilib ki, "Bayraktar AKINCI TİHA" Qara dəniz üzərində hədəf mövqeyində olan pilotsuz uçuş aparatını məhv etmək üçün istifadə olunub və bu, onun həyata keçirdiyi ilk hava atışı olub.

Bunun sadəcə bir sınaq olmadığı, AKINCI-nın artıq EREN sursatından istifadə edərək hava-yer missiyalarından hava döyüşlərinə keçə bilən yeni qabiliyyətə sahib olduğu vurğulanıb.

Bu inkişafın Türkiyənin hava məkanında yeni dövrün başlanğıcı olduğu qeyd edilib: "Türkiyənin hava məkanında yeni imkan var. Hava hədəflərini vurmaq üçün hazırlanmış rover sursatlarının inteqrasiyası pilotsuz uçuş aparatlarının istifadə tərzini dəyişdirə və onların müxtəlif təhdidlərə real vaxt rejimində cavab vermək qabiliyyətini artıra bilər".

Xəbərdə EREN sursatının texniki xüsusiyyətləri də yer alıb: "O, reaktiv mühərrik və süni intellekt tərəfindən idarə olunan 35 kiloqramlıq sistem kimi təqdim edilib. 100 kilometrdən çox mənzilə malik bu sistem havada, quruda və dənizdə hədəfləri vura bilər. Planlara görə, sursat 2026-cı ildə kütləvi istehsala başlayacaq və müxtəlif platformalardan buraxıla bilmə qabiliyyəti sayəsində Türkiyəyə böyük əməliyyat çevikliyi təmin edəcək”.

Son olaraq, Türkiyənin müdafiə texnologiyalarında əldə etdiyi bu səviyyənin regional güc balanslarına təsir göstərə biləcəyi vurğulanıb.

Roza