Trampın “neft oyunu” - ABŞ dünyanı bu yolla aldadır

Müharibə və sülhlə bağlı ziddiyyətli açıqlamaları ilə gündəmdən düşməyən ABŞ prezidenti Donald Trampın İran müharibəsindən iqtisadi qazanc əldə etməyə çalışdığı iddia olunur.

Publika.az “Millliyet”ə istinadən xəbər verir ki, Hacettepe Universitetinin dosenti Şəbnəm Udumun sözlərinə görə, Vaşinqtonun müharibə dövründəki addımları neft qiymətlərinə birbaşa təsir göstərib.

Belə ki, Trampın cümə günü sülhlə bağlı açıqlamalar verməsi qiymətlərin enməsinə səbəb olur, bazar ertəsi isə yeni hücum xəbərləri neftin yenidən bahalaşmasına gətirib çıxarırdı.

Məqalədə qeyd olunur ki, ABŞ bu müddətdə neft ehtiyatlarını daha ucuz qiymətə artıraraq sonradan yüksək qiymətə satmaq imkanı əldə edib. Ekspert hesab edir ki, Tramp dövlət başçısından çox investor kimi davranır və qısamüddətli iqtisadi maraqları ABŞ-ın beynəlxalq nüfuzu ilə müqayisədə üstün tutur.

Udumun fikrincə, müharibənin yaratdığı qeyri-müəyyənlik, xüsusilə də Hörmüz boğazında mümkün məhdudiyyətlər neft bazarında ciddi dalğalanmalara səbəb olub. Bununla yanaşı, ABŞ-ın müttəfiqləri arasında etimadın azalması və Vaşinqtonun etibarlı tərəfdaş imicinin zəifləməsi də diqqət çəkən məqamlardandır.

Ekspert vurğulayıb ki, dövlətlərin hərbi, siyasi və iqtisadi gücünün neftdən asılı olması bu resursun təhlükəsiz və fasiləsiz təminatını strateji məsələyə çevirib.

Müəllif: Roza