Boris Conson Ukrayna-Rusiya sülhünü pozdu - Papuaşvili

Böyük Britaniyanın sabiq baş naziri Boris Conson 2022-ci ildə Ukrayna ilə Rusiya arasında əldə oluna biləcək sülh razılaşmasını pozub.

Publika.az xəbər verir ki, bu iddia ilə Gürcüstan parlamentinin sədri Şalva Papuaşvili çıxış edib.

O bildirib ki, 2022-ci ildə Ukrayna nümayəndə heyətinə Ali Radanın hakim fraksiyasının rəhbəri David Araxamiya başçılıq edirdi. Papuaşvilinin sözlərinə görə, Araxamiya həmin vaxt Rusiyanın irəli sürdüyü razılaşma şərtlərinin Ukrayna üçün qəbulolunan olduğunu açıqlamışdı.

Gürcü siyasətçi qeyd edib ki, danışıqlardan sonra Ukrayna nümayəndələri Kiyevə qayıdıblar. Həmin dövrdə Böyük Britaniyanın baş naziri olan Boris Conson da Kiyevə səfər edib və bundan sonra razılaşma baş tutmayıb.

“Ukrayna nümayəndə heyəti Kiyevə qayıtdı, daha sonra ora Böyük Britaniyanın baş naziri gəldi və bu razılaşmanı dağıtdı”, - deyə Şalva Papuaşvili vurğulayıb.

Gürcüstan parlamentinin sədri əlavə edib ki, həmin hadisələrdən sonra minlərlə insan həyatını itirib, buna baxmayaraq, Boris Conson hazırda sərbəst şəkildə fəaliyyətini davam etdirir və müxtəlif konfranslarda iştirak edir.

Adəm