Vəhşi at qalmaqalı böyüyür: Helikopterlərlə məhv, ölüm təhdidləri və etirazlar - FOTOLAR

Avstraliyanın Yeni Cənubi Uels ştatında yerləşən Snowy Mountains bölgəsində vəhşi atların helikopterlərdən vurularaq məhv edilməsi genişmiqyaslı etirazlara səbəb olub.

Publika.az xəbər verir ki, bu barədə “Daily Mail” məlumat yayıb.

Bildirilib ki, rəsmilər 2027-ci ilə qədər Kosciuszko Milli Parkında vəhşi at sayını 10 mindən 3 minə endirməyi hədəfləyir. Lakin bu qərar həm yerli sakinlər, həm də heyvan haqları müdafiəçiləri tərəfindən sərt şəkildə tənqid olunur.

Mübahisə artıq təkcə ekoloji yox, təhlükəsizlik probleminə də çevrilib. Bəzi akademiklər və əməliyyatı dəstəkləyənlər ölüm təhdidləri aldıqlarını bildirir. Eyni zamanda aktivistlərin helikopter pilotlarına lazer tuşlama, kameraların sıradan çıxarılması kimi müdaxilələr etdiyi iddia olunur.

Əməliyyatı müdafiə edən mütəxəssislər vəhşi atların ekosistemi ciddi şəkildə zədələdiyini bildirir. Onların fikrincə, dırnaqlı və iri heyvanlar torpağı sıxaraq bataqlıq və bitki örtüyünə geri dönməz zərər vurur.

Heyvan haqları müdafiəçiləri isə əməliyyatı “qeyri-insani” adlandırır. Onlar atların öldürülməsi əvəzinə sahibləndirmə və sterilizasiya kimi alternativ üsulların tətbiqini tələb edir.

Məlumata görə, əməliyyata qarşı çıxanların sayı artır və artıq 220 mindən çox imza toplanıb. Sosial şəbəkələrdə də əməliyyatın dayandırılması ilə bağlı çağırışlar edilir.

Müəllif: Roza