Trampın dönüşü bu xətti dəyişib: Avropa diplomatları nədən narazıdır?

Avropa İttifaqı ölkələrinin və bir sıra digər dövlətlərin diplomatları ABŞ-da Donald Trampın hakimiyyətə qayıdışından sonra Vaşinqtonla pərdəarxası diplomatik təmasların zəifləməsindən narazıdır.

Publika.az xəbər verir ki, bu barədə "Politico" nəşri məlumat yayıb.

Uzun illər ərzində ABŞ səfirləri Brüsseldə qeyri-rəsmi şam yeməkləri vasitəsilə Avropa müttəfiqlərini bir araya gətirir, fikir mübadiləsi aparır və ümumi mövqenin formalaşdırılmasına çalışırdı. Lakin diplomatların sözlərinə görə, Donald Trampın Ağ Evə qayıdışından sonra bu ənənə demək olar ki, aradan qalxıb.

Nəşr yazıb ki, həmin görüşlər əsasən ABŞ səfirinin iqamətgahında keçirilir, iştirakçılar isə diqqətlə seçilirdi. Tədbirlərə Aİ ölkələri ilə yanaşı Böyük Britaniya və Yaponiya kimi tərəfdaş dövlətlərin nümayəndələri də qatılırdı. Görüşlər zamanı ticarət, təhlükəsizlik və xarici siyasət məsələləri qeyri-rəsmi şəkildə müzakirə olunurdu.

Qeyd edilib ki, bu görüşlərin zəifləməsi ABŞ-ın Avropa İttifaqından daha çox uzaqlaşması tendensiyasının göstəricisi kimi qiymətləndirilir. Mənbələrin bildirdiyinə görə, ABŞ nümayəndəliyinin fəaliyyəti əvvəlki dövrlə müqayisədə münasibətlərin qurulmasına daha az fokuslanıb və qeyri-rəsmi diplomatiya ənənəsi də zəifləyib.

Bununla belə, diplomatlar bildiriblər ki, Vaşinqton qeyri-rəsmi diplomatiyadan tam imtina etməyib. ABŞ nümayəndəliyi hələ də şam və nahar görüşləri təşkil edir, ancaq əvvəlki qədər tez-tez və əvvəlki formatda deyil.

Nəşr vurğulayıb ki, əvvəllər bu görüşlər iştirakçılara məlumat sızmasından çəkinmədən açıq dialoq aparmaq imkanı yaradırdı.

Müəllif: Adəm