İsrailli nazirdən ABŞ-a şikayət edildi: İşgəncə və zorakılıq siyasəti aparıb

Belçikada fəaliyyət göstərən Hind Rəcəb Fondu İsrailin milli təhlükəsizlik naziri İtamar Ben-Qvirlə bağlı ABŞ Ədliyyə Nazirliyinə şikayət təqdim edib.

Publika.az xəbər verir ki, bu barədə "Clash Report" sosial şəbəkəsində məlumat yayıb.

Məlumata görə, fond Ben-Qviri İsrail həbsxanalarını fələstinlilərə, o cümlədən ABŞ vətəndaşlarına qarşı işgəncə və zorakılıq məkanına çevirməkdə ittiham edib.

Şikayətdə bildirilir ki, Ben-Qvirin rəhbərliyi dövründə həbsxanalarda aclıq, tibbi laqeydlik, seksual zorakılıq və digər qəddar rəftar halları qeydə alınıb. Fondun iddiasına əsasən, 2023-cü ilin oktyabrından 2025-ci ilin avqustuna qədər azı 46 fələstinli bu siyasətin qurbanı olub.

Fond nümayəndələri həmçinin qeyd ediblər ki, nazirin siyasəti və ictimai açıqlamaları fələstinlilərə qarşı soyqırımı niyyətini əks etdirir və bu səbəbdən Vaşinqtonu onun fəaliyyəti ilə bağlı araşdırma aparmağa çağırıblar.

Xatırladaq ki, Ben-Qvir 2025-ci ilin noyabrında fələstinliləri “uydurma xalq” adlandıraraq onların İsrail xarabalıqları üzərində dövlət qurmağa çalışdıqlarını bildirmişdi.

Adəm