Avropada qaçqın düşərgəsinə etiraz: Polis 7 nəfəri saxladı

Niderlandın Gelderland əyalətinin Kesteren kəndində təxminən 200 nəfər sığınacaq axtaranlar üçün mərkəzin açılmasına etiraz edib.

Publika.az xəbər verir ki, aksiya qonşu Opheysden şəhərinə girişin məhdudlaşdırılmasından sonra başlayıb. Burada bələdiyyə şurasının iclası keçirilirdi. Əvvəlcə sakit keçən etiraz daha sonra güclü pirotexnikadan istifadə olunması ilə gərginləşib. Polis xüsusi təyinatlı bölmələri əraziyə cəlb edərək aksiyanı dağıdıb.

Etirazçılar “Qaçqın düşərgəsinə yox!” və “Buradan rədd olun!” şüarları səsləndiriblər.

Polis 7 nəfəri saxlayıb. Onlardan 4-ü pirotexnikadan qanunsuz istifadə etməkdə, 3-ü isə hüquq-mühafizə əməkdaşlarına müqavimət göstərməkdə şübhəli bilinir.

Bələdiyyə hələ mərkəzin yaradılması ilə bağlı yekun qərar verməyib. Hazırda 150 və ya 300 nəfər sığınacaq axtaran şəxs üçün mərkəz variantları nəzərdən keçirilir.

Qeyd edək ki, bir həftə əvvəl Opheysdendə keçirilən oxşar etiraz da iğtişaşlarla nəticələnib və 14 nəfər saxlanılıb. Niderlandda miqrantların qəbulu sisteminə düşən yük və yerləşdirmə yerlərinin çatışmazlığı fonunda yeni mərkəzlərin açılması yerli sakinlərin etirazlarına səbəb olur.

Müəllif: Adəm Abbaslı