Masazırda duz gölünün daşması ilə bağlı RƏSMİ AÇIQLAMA

Abşeronda rayonunda Masazır qəsəbəsi ərazisində duz gölünün daşması barədə yayılan məlumatlar həqiqəti əks etdirmir.

Bunu Publika.az-a açıqlamasında Ekologiya və Təbii Sərvətlər Nazirliyi (ETSN) Milli Geoloji Kəşfiyyat Xidmətinin geoloji planlama ekspedisiyasının rəisi Əziz Qaralov deyib.

Onun sözlərinə görə, bu barədə məlumat yayılan kimi əməkdaşlar hadisə yerinə göndərilib və göl suyunun yola dağılmasının daşqınla əlaqədar olmadığı müəyyən edilib:

“Duz gölü Masazır-Novxanı magistral yolunun yaxınlığına Badam bağları yaşayış massivinin aşağı hissəsindədir. Həmin göl ilə magistral yolun səviyyəsi demək olar ki bərabərdir. Buna görə də güclü külək əsəndə ləpələr göldəki suyun bir hissəsini sahilə vurur. Həmin sular da yola dağılıb. Bu da insanlarda gölün daşması təəssüratı yaradıb”.

Ə.Qaralov ətrafda yaşayış məntəqələrinin sayının artması ilə əlaqədar göldə suyun səviyyəsinin artması barədə məlumatların da həqiqəti əks etdirmədiyini deyib:

“Ərazidə son illər salınmış Badam bağları və məcburi köçkünlər üçün salınmış yaşayış massivi var. Onların hər ikisinin də kanalizasiya sistemi olduğunda sular gölə axıdılmır. Ona görə də yaşayış məntəqələrinin artımı səbəbində göldə suyun səviyyəsinin artımı barədə fikir səsləndirmək doğru deyil”.

Qeyd edək ki, ötən gün mətbuatda Masazır qəsəbəsindəki duz gölünün daşması səbəbindən Masazır-Novxanı magistralını su basması barədə məlumat yayılmışdı. Məlumata görə, yerli sakinlər gölün daşmasını əraziyə normadan artıq suyun axıdılması ilə əlaqələndiriblər.

Gülxar