Azərbaycanda yağış suları bu cür idarə olunacaq

"Azərbaycanda su ehtiyatlarının artırılması ilə bağlı tədbirlər görülür və hazırda 10-a yaxın su anbarının tikilməsi planlaşdırılır. Pirsaatçay, Bolqarçay su anbarları bura daxildir".

Publika.az xəbər verir ki, bunu Ekologiya və Təbii Sərvətlər Nazirliyinin Su ehtiyatlarının idarə edilməsi şöbəsinin müdiri Mütəllim Əbdülhəsənov "Ekspert saatı"nda deyib.

M.Əbdülhəsənov qeyd edib ki, ötən gün aparılan monitorinqin nəticəsinə görə, Qıraqkəsəmən məntəqəsində suyun kəmiyyət göstəricisi 135 kubmetr saniyə olub: "Bu rəqəm bizi qane etmir. Çünki aşağı göstəricidir. Mayın sonuna qədər çaylarda sululuğun artması gözlənilir. Su ilə bağlı məsələ komissiya çərçivəsində müzakirə olunur və ölçmələr Nazirlər Kabinetinə göndərilir".

Şöbə müdiri yağış sularının idarə olunmasından da danışıb. Bildirib ki, hazırda Azərbaycanda bununla bağlı imkanlar yetərincə deyil: "Bu, nazirliyin diqqətindədir. Problem və çətinliklərlə bağlı "Azərsu" ASC ilə də danışıqlar aparırıq. Artıq fəaliyyətlər müəyyən edilib. Bakının yeni hazırlanan baş planında bu məsələ aktuallığı ilə qeyd olunacaq. Qanunvericilikdə ediləcək dəyişikliklə bunu idarə edən yeni qurum yaradılacaq. Yağış suları birbaşa dənizə axıdılmayacaq. Parkların kənarında gələcəkdə istifadə üçün anbarların tikilməsi də ola bilər. Bu isə öz növbəsində təmiz sudan istifadəni azaldacaq”.

Akqabay