Şagirdlərə bunlar qadağan edilir - Qısa ətək, saqqal, saç rəngi...

Elm və Təhsil Nazirliyi tərəfindən “Ümumi təhsil müəssisələrində şagird davranış qaydaları” hazırlanıb.

Publika.az xəbər verir ki, bu gün sözügedən layihə artıq nazirliyin saytında yerləşdirilib.

Yeni qaydalarda xüsusi olaraq vurğulanır ki, sənəd ümumi təhsil müəssisələrində şagird davranış qaydaları ilə bağlı çərçivəni müəyyən edəcək.

Bundan başqa sənəddə digər məqamlar da yer alır.

Daha çox maraq doğuran şagirdlərə geyim və xarici görünüşlə bağlı qoyulan qadağalarla bağlıdır

Qaydalarda bildirilir ki, şagirdlər şəxsi gigiyena qaydalarına riayət etməli, dərs zəngindən əvvəl üst geyimi (palto, papaq, kapüşonlu jaket və s.) çıxarmalıdır.

Bundan başqa, ümumi təhsil müəssisəsi təhsilalanlarının geyim formalarına aid qaydalara riayət etməli (məktəbli forması, ayaqqabı və s.), geyim səliqəli və təmiz olmalı, uzunluğu çiyindən aşağı saçları səliqəli şəkildə arxadan toplamalıdır.

Eyni zamanda, fiziki tərbiyə dərsləri üçün məktəbin geyim qaydalarına riayət etməlidirlər.

Şagirdlərə tətbiq olunan qadağalar da yeni qaydalarda öz əksini tapıb. Vurğulanır ki, çox dar geyim, hündürdaban ayaqqabı, dizdən yuxarı ətək, zinət əşyası və bahalı saat kimi aksesuarlar, qeyri-adi saç düzümü və saç rəngi, uzun və rəngli dırnaqlar, makiyaj, saqqal qadağandır.

Həmçinin ümumtəhsil müəssisələrinin yuxarıda qeyd olunanlarla bağlı daxili qaydalar tərtib etmələri tələb edilir.

Tural Turan