Musiqi məktəblərində elə adamlar çalışır ki, not nədir bilmir - Vitse-spiker

Nazirlər Kabinetinin tabeliyindəki Tərcümə Mərkəzi fəaliyyətini dayandırıb. Amma Azərbaycan Yazıçılar Birliyinin nəzdində Bədii Tərcümə Mərkəzi fəaliyyət göstərir. Ona ayrılan vəsait artırıla bilər.

Publika.az xəbər verir ki, bunu Milli Məclisin vitse-spikeri Rafael Hüseynov parlamentin Gənclər və idman, İctimai birliklər və dini qurumlar, Mədəniyyət komitələrinin bugünkü birgə iclasında bildirib.

O qeyd edib ki, yeni qurumlar yaratmaq əvəzinə mövcud müəssisələrə dəstək olmaq daha yaxşıdır: “Yazıçılar Birliyinin nəzdindəki Tərcümə Mərkəzinin ayrıca tərcümə jurnalı da var. Mən müraciət etmişdim, çox yox, 200-300 min manat ayrılsın ki, həmin Tərcümə Mərkəzini inkişaf etdirək. Mənə elə gəlir, Maliyyə Nazirliyi bu məsələni də nəzərə ala bilər”.

R.Hüseynov həmçinin musiqi məktəblərindəki son vəziyyətə toxunub. Onun sözlərinə görə, musiqi məktəbində çalışanların işsiz qalması arzuolunan deyil: "Rayon musiqi məktəblərində elə adamlar çalışır ki, heç not bilmir, elementar biliklərdən məhrumdurlar. Eyni zamanda, bu gün mədəniyyət evləri və klublar öz funksiyalarını yerinə yetirə bilmir. Bütün istiqamətlər üzrə modernləşməyə çalışacağıq. Bu zaman ixtisarların, bağlanmaların da səbəbi aydın olar”.