Reza Deqati ermənilərin Tərtərə atdığı fosfor bombalarını çəkdi - FOTOLAR

Dünyaca məşhur azərbaycanlı fotoqraf Reza Deqati hərbi əməliyyatların davam etdiyi Dağlıq Qarabağda çəkdiyi görüntüləri paylaşıb.

Publika.az xəbər verir ki, görüntülərdə erməni hərbi birləşmələrinin Azərbaycanın mülki yaşayış obyektlərinə hücumu zamanı istifadə etdiyi fosfor tərkibli bombaların partlayışı əks olunub.

R.Deqati bildirib ki, 3 noyabr 2020-ci il tarixində ANAMA-nın xüsusi mobil əməliyyat qrupları Tərtər rayonunun Səhlabad kəndi yaxınlığında iki ədəd partlamamış 122 mm-lik D-4 (P-4) ağ fosfor mərmi taparaq yerində zərərsizləşdirib. O da ANAMA-nın apardığı bu əməliyyata şahid olmaq üçün bir qrup fotoqraf, operator və jurnalistlə birgə həmin bölgəyə səfər edib.

“Ermənistan Azərbaycanın Tərtər bölgəsindəki mülki əhaliyə qarşı ağ fosfor mərmilərindən istifadə etməyə davam edir. Ağ fosfor daşıyan silahlar tənəffüs edildikdə, udulduqda və ya insan bədəninin yanıq olan hissələrindən daxilə keçərsə son dərəcə zəhərli olur və insan sağlamlığına ciddi mənfi təsir göstərə bilər. Bu cür silahlar ağır kimyəvi yanıqlara səbəb olur. Ermənistan fosfor bombalarından istifadə edir. Ağ fosfor maddəsi ilə mülki əhali və ya mülki obyektlərə, habelə meşələrə və digər bitki növlərinə edilən hücumlar 1980-ci il tarixli BMT-nin Yandırıcı Silahların İstifadəsinə Qadağa və Məhdudlaşdırmalara dair Konvensiyasının III Protokolu ilə qadağan olunub.