Qırışların sürətlə çoxalmasına səbəb olan AMİLLƏR

12-14 yaşından başlayaraq dəriyə qulluq etmək lazımdır, yağ və tər vəziləri bu yaşda inkişaf edir. Yaşla bağlı dəridə ilk dəyişikliklər isə 25-28 yaşlarında artıq nəzərə çarpır. Lakin sızanaqlar, sızanaqdan sonrakı çapıqlar və yağlı dəriniz varsa, kosmetoloqa daha erkən yaşda müraciət etməlisiniz.

Publika.az xəbər verir ki, bu sözləri kosmetoloq-dermatoloq Daria Permyakova Sankt-Peterburq telekanalında danışıb. Həkim qeyd edib ki, bütün sərbəst karbohidratlar kollagenin sintezini məhv etmək üçün fəaliyyət göstərir.

“Biz onları rasiondan çıxarmağa çalışırıq. Əlbəttə ki, şirniyyatsız mümkün deyil, bunlar bizim endorfinlərimizdir və əhval-ruhiyyənin yaxşılaşmasında birbaşa rol oynayır, lakin onları azaltmalıyıq. Unutmayın ki, karbohidratlar kollageni məhv edir. Mənim üçün gündə bir çizkeyk normadır, həqiqətən stresli olduğum günlərdə isə şokolad da yeyirəm”- Permyakova izah edib.

Həmçinin dərinin vəziyyəti birbaşa yuxudan asılıdır, 22:00-dan 02:00-a qədər insan yatmalıdır. Melatonin hormonunun sintezinin optimal şəkildə baş verməsi üçün tor qişaya işıq düşməməlidir.

Kosmetoloq həmçinin xanımları kosmetoloji prosedurlardan çəkinməməyə çağırıb. Onun sözlərinə görə, düzgün dozada botulinum toksini yalnız qırışlar əmələ gətirən üz əzələlərinə təsir edir. O, həmçinin bildirib ki, qədərində istifadə olunarsa, gialuron turşusu dodaqlara təbii həcm verir. Yaşla bağlı yox olan həcmi və dodaq konturunu bərpa etmək, eləcə də asimmetriyanı aradan qaldırmaq üçün effektiv məhsuldur.

Məlumat üçün bildirək ki, kollagen – birləşdirici toxumanın əsasını təşkil edən sapşəkilli (fibrillar) zülaldır, əzələlərin, sümüklərin, dərinin və oynaq bağlarının da əsasını təşkil edir. Daha dəqiq desək, insan orqanizmindəki bütün zülalların 30-35 %-ni məhz kollagen zülalı təşkil edir. Birləşdirici toxumanın əsasını təşkil etdiyi üçün dəri və oynaqların elastikliyində mühüm rol oynayır. Kollagen zülallarının zədələnməsi zamanı dəri tez qocalır, oynaq ağrıları baş qaldırır. Son tətqiqatlarda sübüt olunub ki, kollagen dəridəki qırışlarla aktiv mübarizə aparır, hətta selülit probleminin həllində yardımçı olur.

Aytən Məftun