Musa Quliyev: “Gələn il Azərbaycan üçün uğurlu il olacaq”

“Azərbaycan artıq neftdən asılı olmayan bir ölkə kimi inkişaf edir”.

Bu barədə Publika.az-a açıqlamasında Milli Məclisin deputatı Musa Quliyev Prezident İlham Əliyevin Nazirlər Kabinetinin 2017-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında çıxışı haqda danışarkən deyib.

M.Quliyev qeyd edib ki, Prezident İlham Əliyevin bəyan etdiyi strateji inkişaf xətti doğrudur və bu xətt qabarıq şəkildə görünür.

“Son illərdə neftin qiymətinin kəskin şəkildə aşağı düşməsi və Azərbaycanda neftdən asılılığın aradan qaldırılması müşahidə edilir. Dövlətimizin başçısının qeyri-neft sektorunun əsas dörd istiqaməti üzrə - kənd təsərrüfatı, turizm, nəqliyyat və informasiya-kommunikasiya texnologiyaları istiqamətində qarşıya qoyduğu vəzifələr müvafiq qurumlar tərəfindən həyata keçirilir. Ötən doqquz ay ərzində Azərbaycanın ümumi daxili məhsulu 2,4 faiz artıb. Digər sahələrdə, xüsusilə kənd təsərrüfatı, sənaye sahələrində də artım var. Bütün bunlar onu göstərir ki, Azərbaycanın hərtərəfli inkişafı təmin edilib. Prezident İlham Əliyev kənd təsərrüfatının emal sənayesinin inkişafının müsbət nəticələrini xüsusilə qeyd etdi. Dövlətimizin başçısı ixrac potensialının kifayət qədər olduğunu, artıq görülən işlərin real nəticələr verdiyini söylədi. Bildirdi ki, Azərbaycana kənd təsərrüfatı sektorundan ixrac nəticəsində milyonlarla dollar valyuta daxil olub”, - deyə o vurğulayıb.

Milli Məclisin deputatı Prezidentin turizmin inkişafı ilə bağlı fikirlərini və verdiyi tövsiyələrini də şərh edib: “Dövlətimizin başçısı bu sahənin daha da inkişaf etdirilməsi, gəlirli sahəyə çevrilməsi üçün görülən işləri qeyd etdi. İclasda logistik xidmətlərin genişləndirilməsinin və bu sahədə yeni mərkəzlərin yaradılmasının da Azərbaycanın ixrac potensialının yaxşılaşdırılmasına, həm də qeyri-neft sektorunun inkişafına öz töhfəsini verəcəyi vurğulandı. Dövlətimizin başçısı xüsusilə qeyd etdi ki, bu yaxınlarda “Əsrin müqaviləsi”nin 2050-ci ilə qədər uzadılması Azərbaycanın ən böyük uğurlarından biridir. Bununla yanaşı, Prezident İlham Əliyev ölkəmizdə ictimai-siyasi sabitliyin olduğunu vurğuladı. Bu, xalqın ölkə Prezidentinə inamı ilə bağlıdır və qarşılıqlı məhəbbətdən irəli gəlir. İclasda Prezident İlham Əliyev qarşıda duran məsələlər barədə də fikirlərini söylədi, bununla bağlı tapşırıq və tövsiyələrini verdi. Yol infrastrukturunun inkişaf etdirilməsi, ixrac potensialının artırılması vacib məsələlərdir. Prezidentin iclasdan sonra qeyri-rəsmi məşğulluğun qarşısının alınmasına dair Tədbirlər Planının təsdiq edilməsi haqqında imzaladığı Sərəncam mühüm əhəmiyyət daşıyır. Qaçqın və məcburi köçkünlərin sosial şəraitinin yaxşılaşdırılması ilə dövlətimizin başçısı söylədi ki, yaxın ildə minlərlə ailə yeni mənzillərlə təmin olunacaq. Təkcə qaçqın və məcburi köçkünlərin deyil, eyni zamanda, sosial evlər layihəsinin bir uğurlu nəticəsi kimi aztəminatlı ailələrin də mənzil şəraitinin yaxşılaşdırılması mümkün olacaq”.

M.Quliyev əlavə edib ki, gələn il Azərbaycan üçün uğurlu il olacaq.

“Heç də təsadüfi deyil ki, artıq beynəlxalq reytinq də Azərbaycanın vəziyyətinin yaxşı olduğunu göstərir və ölkəmiz daha yüksək yerlər tutmaqda davam edir. Bu, onu göstərir ki, Azərbaycan iqtisadiyyatı harmonik inkişaf edir və şaxələnmiş iqtisadiyyatdır. Bu da ölkədə balanslaşdırılmış siyasətin aparılmasının bariz nümunəsidir”, - deyə Milli Məclisin üzvü diqqətə çatdırıb.

Asif