Toydan qayıdarkən qəzaya düşdülər: 2 ölü - VİDEO

Toydan qayıdan ailə qəzaya düşüb. Nəticədə iki nəfər ölüb.

Hadisə Göyçay rayon ərazisində baş verib. Gəncədən toydan qayıdan Bakı şəhər sakini Məmməd Məmmədov paytaxt istiqamətində hərəkətdə olarkən idarə etməni itirib və avtomaşını aşırıb. Qəza nəticəsində sürücünün həyat yoldaşı Elmira Məmmədova və bacısı hadisə yerində ölüblər.

Maşında olan digər sərnisin-sürcücünün yeznesı xəsarət alıb. Yaralı dərhal İsmayıllı rayon Mərkəzi Xəstəxanasına aparılıb.

Bakıda isə zəncirvari qəzada 7 nəfər xəsarət alıb. Gecə Bakı dairəvi yolunun Yasamal rayonu ərazisinə düşən hissəsində şəhər istiqamətində hərəkətdə olan qumla dolu yük maşını yol kənarında dayanan mişar daşı ilə yüklü avtomobilə arxadan çırpılıb. Qəzada yük avtomobilinin kabinə hissəsi deformasiyaya uğrayıb. Sürücü sükan arxasında sıxılmış vəziyyətdə qalıb. Əraziyə xilasedicilər cəlb edilib. Xilasedicilər xüsusi alətlərin köməyi ilə sürücünü avtomobildən çıxara biliblər.

Xilasetmə əməliyyatının sonunda yüksək sürətlə hərəkətdə olan başqa bir minik maşınının sürücüsü idarəetməni itirərək Fövqəladə Hallar Nazirliyinin əməkdaşlarını vurub. Nəticədə xilasedicilər müxtəlif xəsarətlər alıblar. Yaralılar xəstəxanaya çatdırılıblar. 28 yaşlı Vüsal Şabanov, 58 yaşlı Ramiz Şüvərxanov, 46 yaşlı Ziyəddin Yəhyayev və Xətai Məmmədovun vəziyyəti qənaətbəxşdir. Daha iki yaralı isə ambulator müalicəyə buraxılıb. Qəzanın dəqiq səbəbi təyin olunan ekspertizanın rəyindən sonra məlum olacaq.