"Milan" Modriçlə bağlı qərar verdi

“Milan” klubu təcrübəli xorvatiyalı yarımmüdafiəçi Luka Modriçlə əməkdaşlığı davam etdirmək istəyir.

Publika.az xəbər verir ki, bu barədə jurnalist Nikolo Skira məlumat yayıb.

Mənbə “rossoneri”nin idman direktoru İqli Tarenin sözlərini sitat gətirib. O bildirib ki, 40 yaşlı yarımmüdafiəçini komandada saxlamaq klub üçün çox sadə qərardır, lakin futbolçunun gələcəyi yalnız Modriçin öz istəyindən asılıdır.

“Biz Luka Modriçi sevirik və o da “Milan”ı sevir. Onu komandada saxlamağa hazırıq, çünki müqaviləsini daha bir il uzatmaq imkanı var. Bu, bizim üçün çox sadə qərardır, amma hər şey onun istəyindən asılıdır”, – deyə “qırmızı-qaralar”ın nümayəndəsi bildirib.

Modriç 2025-ci ilin iyulunda Madridin “Real” klubundan ayrılaraq “Milan”a transfer olunub. Xorvatiyalı futbolçunun klubla müqaviləsi 2025/26 mövsümünün sonuna qədər qüvvədədir və əməkdaşlığın daha bir il uzadılması ilə bağlı razılaşma da mövcuddur.

Transferindən bəri Modriç “rossoneri”nin heyətində 31 oyuna çıxıb, 2 qol vurub və 3 məhsuldar ötürmə edib.

Qeyd edək ki, Massimiliano Alleqrinin komandası 60 xalla turnir cədvəlində ikinci pillədə qərarlaşıb və mövsümün lideri “İnter”dən 8 xal geri qalır.

Heybət