“Qarabağ”ın yeni transferi: Azərbaycanda güclü çempionat var - MÜSAHİBƏ

“Qarabağ”ın Kipr təmsilçisi “Omoniya”dan transfer etdiyi Jali Muaddib jurnalistlərə müsahibə verib.

25 yaşlı vinger Ağdam təmsilçisinə keçidindən, ondan gözləntilərdən və qarşıdakı hədəflərindən danışıb.

Publika.az müsahibəni təqdim edir:

- Kiprin “Omoniya” klubundan “Qarabağ”a transferiniz necə baş tutdu? Həlledici amil nə oldu?

- Mən Kiprdə oynayırdım, təklif gəldi və bu barədə ailəmlə danışdım. Onlar da razılıq verdilər. Sözsüz ki, “Qarabağ”ı tanıyırdılar. Çünki son illərdə Avropada yaxşı nəticələr əldə edir, uzun illərdir baş məşqçisi dəyişmir.

Bilirik ki, yaxşı klubdur. “Qarabağ”ın təklifinə bir gün ərzində “hə” dedim. Bu kluba qoşulduğum və onun bir hissəsi olduğum üçün fəxr edirəm.

- Başqa klublardan da təkliflər var idi?

- Bəli.

- Onların arasında Azərbaycan klubları olub?

- Rəsmi təklif yox idi.

- Adaptasiya prosesiniz necə gedir?

- Sözsüz ki, yeni komandaya gələndə müəyyən çətinliklər olur. Çünki birlikdə oynamamışıq, məşq etməmişik. Amma buradakı məşqçilərim və komanda yoldaşlarım çox yaxşıdırlar. Hamı mənə kömək etməyə çalışır. Mən də əlimdən gələni edirəm ki, tez bir zamanda komandaya uyğunlaşım və məndən nə tələb olunduğunu daha yaxşı anlayım.

- Klubun düşərgəsinə ilk qoşulduğunuz vaxt Qurban Qurbanov hazırkı performansınızla bağlı sizə nə dedi?

- İndiyədək vaxtımız az olduğundan uzun söhbətimiz olmayıb. Mən “Omoniya”da son mövsümü necə keçirmişdimsə, məndən eyni performansı gözləyir. Ümid edir ki, “Qarabağ”a kömək edəcəyəm. Mən də əlimdən gələni edəcəyəm ki, birlikdə uğurlu mövsüm keçirək.

- Azərbaycan çempionatı barədə əvvəlcədən məlumatınız var idi? Ümumilikdə “Qarabağ”dakı hədəfləriniz nədir?

- “Qarabağ”da ikinci Zubir (Abdullah Zubir - red.) olmaq istəyirəm. Ötən mövsüm də “köhlən atlar” mənə maraq göstərmişdi. Həmin vaxtdan Azərbaycan futbolu ilə maraqlanmağa başladım. Bilirəm ki, burada güclü çempionat var. Ötən mövsüm maraqlı keçdi. “Sabah” və “Neftçi” gücləniblər. Bunlardan məlumatlıyam.

- Avropa Liqasının I təsnifat mərhələsində İslandiya təmsilçisi “Vestri” ilə qarşılaşacaqsınız. Bu rəqib barədə nə düşünürsünüz?

- Bizdə olan məlumata görə, onlar ötən mövsüm ölkə kubokunun qalibi olublar. Bu turnirdə asan rəqib yoxdur. Hər komandaya qarşı yaxşı oynamaq lazımdır. Əlimizdən gələni edəcəyik ki, onları məğlub edib növbəti mərhələyə vəsiqə qazanaq.