"Qarabağ"ın oyunu bu hakimlərə tapşırıldı

Azərbaycan klublarının UEFA Çempionlar Liqası, Avropa Liqası və Konfrans Liqasında keçirəcəkləri cavab oyunlarının hakim təyinatları müəyyənləşib.

Publika.az xəbər verir ki, bu barədə UEFA məlumat yayıb.

Çempionlar Liqasının 2-ci təsnifat mərhələsində Finlandiyanın “KuPS” və “Sabah” komandaları arasında keçiriləcək görüşü İsraildən olan referi Qal Leyboviç idarə edəcək. Ona Roy Hassan və Yossi Babayoff kömək edəcəklər. Dördüncü hakim Dekel Zino olacaq. VAR hakimi funksiyasını Daniel Bar Natan, AVAR vəzifəsini isə Eitan Şmuelevits yerinə yetirəcək.

Qarşılaşma iyulun 28-də Finlandiyada, saat 20:00-da başlayacaq. Bakıdakı ilk oyunda “Sabah” 1:0 hesablı qələbə qazanıb.

UEFA Avropa Liqasının 2-ci təsnifat mərhələsinin ÇSKA (Sofiya) – “Qarabağ” qarşılaşması Belçikadan olan Bram Van Drisşə həvalə olunub. Mişel Seeldraeyers və İv De Neve yan xətt hakimləri, Kevin Van Damm isə dördüncü hakim olacaq. VAR hakimi Bert Put, AVAR isə Vesli De Kremer təyin edilib.

Oyun iyulun 30-da Sofiyadakı “Vasil Levski” stadionunda, saat 23:00-da start götürəcək. Komandalar arasında Bakıda keçirilən ilk görüş qolsuz yekunlaşıb.

UEFA Konfrans Liqasının 2-ci təsnifat mərhələsinin “Dinamo” (Minsk) – “Neftçi” matçına Şimali İrlandiyadan olan Tim Marşall təyinat alıb. Ona Georgios Arqiropulos və Rayan Kelsi kömək edəcəklər. Dördüncü hakim Şeyn Makqoniql olacaq.

Görüş iyulun 30-da Bolqarıstanın Stara Zaqora şəhərindəki “Beroe Siti” stadionunda, saat 22:00-da başlayacaq. İlk oyunda Belarus təmsilçisi Bakıda 4:2 hesablı qələbə qazanıb.

Konfrans Liqasının “Zirə” – “Payde” qarşılaşmasını isə Xorvatiyadan olan Dario Bel idarə edəcək. Ona İvan Yaniç və Dino Knez kömək edəcək, dördüncü hakim funksiyasını isə Patrik Pavleşiç yerinə yetirəcək.

Tərəflər arasında cavab matçı iyulun 31-də Bakıda keçiriləcək. İlk qarşılaşmada Estoniya təmsilçisi 1:0 hesablı qələbəyə sevinib.