FIA pilotlarla görüşəcək - Qalmaqallara görə

Qarşıdan gələn Macarıstan Qran Prisi zamanı FIA Formula 1 pilotları ilə stüard işi və yarış standartlarını müzakirə etmək üçün görüş keçirəcək.

Publika.az xəbər verir ki, bu barədə “PlanetF1” məlumat yayıb.

Mənbənin məlumatına görə, görüşün əsas mövzularından biri Belçika Qran Prisində “Ferrari” pilotları Şarl Lekler və Lyuis Hemiltonun iştirakı ilə baş verən mübahisəli hadisələr olacaq.

Lekler Oskar Piastrinin iştirakı ilə baş verən manevrdən sonra cəzadan yayındı, Hemilton isə ilk dövrədə Corc Rassel ilə toqquşmaya görə cəza aldı.

Mənbənin qeyd etdiyi kimi, bu hadisələrlə bağlı qərarların özü əsas məsələ deyil. Daha çox sual doğuran məqam, stüardların FIA Beynəlxalq İdman Məcəlləsini və Sürücülük Standartları Təlimatını necə şərh etməsidir, çünki hər iki sənəd müxtəlif şərhlərə yer buraxır.

Hər iki hadisənin FIA məlumat bazasına daxil edilməsi və qərarların səbəblərinin ətraflı təhlili gözlənilir. Mövsümün ortalarında keçirilməsi planlaşdırılan görüş sürücülərə və federasiya rəsmilərinə qaydaları daha ümumi şəkildə anlamağa və gələcəkdə hakimlik işlərinin ardıcıllığını artırmağa kömək etməlidir.