Bu ərəb ölkəsi İnfantinonu dəstəklədi

Qətər Futbol Federasiyasının prezidenti Həməd bin Xəlifə bin Əhməd Əl-Tani FİFA prezidenti Canni İnfantinonun Dünya Kuboku hüquqlarının bir hissəsini özəl investorlara satmaq təklifini geri götürmək qərarını dəstəkləyib.

Publika.az xəbər verir ki, daha əvvəl UEFA və onun 55 milli assosiasiyasının hamısı yekdilliklə bütün FİFA yarışlarının (kişi və qadınlar arasında Dünya Kubokları da daxil olmaqla) tamamilə boykot edilməsinə səs vermişdi. Bu radikal qərar, İnfantinonun Dünya Kuboklarının kommersiya hüquqlarının idarə olunmasına özəl investorları cəlb etmək planlarına cavab olaraq Avropa futbol idarəetmə orqanının təcili iclasında qəbul edildi. Daha sonra Asiya Futbol Konfederasiyası və KONKAKAF da bu məsələyə qoşuldu.

Qətər Futbol Federasiyasının prezidenti açıqlamasında bildirib:

“FİFA prezidenti Canni İnfantinonun qlobal futbol ictimaiyyətinin maraqları naminə “FIFA Forward Enterprise” təklifini geri götürmək qərarını alqışlayırıq . Təklifin öz üstünlükləri olsa da, FİFA-nın üzv assosiasiyaları arasında birliyə üstünlük vermək qərarının müdrikliyini təqdir edirik.

Qətər Futbol Federasiyası Prezident İnfantinonun dünya miqyasında futbolun daha da inkişaf etdirilməsi və gücləndirilməsi səylərini tam dəstəkləyir”.