FİFA Misir yığmasının 3 üzvünə qarşı iş açdı

FİFA Misir milli komandasının üç üzvünə – baş məşqçi Hossam Hassan, komanda meneceri İbrahim Hassan və hücumçu Mustafa Zikoya qarşı intizam işi açıb.

Publika.az xəbər verir ki, bu barədə Misir Futbol Assosiasiyasının mətbuat xidməti məlumat yayıb.

Futbol qurumu açıqlamasında bütün FİFA qaydalarına hörmət etsə də, komandasının nümayəndələrini qoruyacağını qeyd edib.

“Assosiasiya FİFA-nın qaydalarına və prosedurlarına hörmət etdiyini təsdiqləyir. Lazımi cavablar və hüquqi sənədlər müəyyən edilmiş müddətlər ərzində təqdim ediləcək. Assosiasiya həmçinin proseslərdə iştirak edən şəxslərə və rəsmi kanallar vasitəsilə Misir futbolunun hüquqlarının qorunmasına dəstəyini təsdiqləyir.

Bundan əlavə, assosiasiya ədalətli oyun prinsiplərinə və yarış təşkilatçılarına hörmətini vurğulayır və məşqçilər heyətinin, oyunçuların maraqlarını müvafiq FİFA qurumları qarşısında müdafiə etmək hüququnu özündə saxlayır”, – deyə təşkilatın açıqlamasında bildirilir.

Xatırladaq ki, “Fironlar” 1/8 finalda Argentinaya 2:3 hesabı ilə uduzaraq mübarizəni dayandırmışdılar.

Hossam Həsən və Mustafa Ziko həmin matçda hakimin işini açıq şəkildə tənqid etmişdi.

Publika.az