Arteta Alvarezi transferə razı salmaq istədi, argentinalı zəngə cavab vermədi

“Arsenal”ın baş məşqçisi Mikel Arteta “Atletiko Madrid”in argentinalı hücumçusu Xulian Alvarezlə əlaqə saxlayaraq onu London klubunun layihəsinə cəlb etməyə çalışıb. Lakin futbolçu ispaniyalı mütəxəssisin telefon zənginə cavab verməyib.

Publika.az-ın məlumatına görə, İspaniyanın “El Chiringuito” proqramında jurnalist Josep Pedrerol bildirib ki, Arteta Alvarezlə şəxsən danışaraq onu “Arsenal”a keçməyə inandırmaq istəyib. Ancaq argentinalı hücumçu bu zəngə cavab verməyib.

Bu addım Alvarez-in “Arsenal”a keçidə marağının olmadığının göstəricisi kimi qiymətləndirilir. Futbolçunun əsas istəyinin isə “Barselona”ya transfer olunmaq olduğu bildirilir.

Pedrerol “Barselona”nın transferi reallaşdırmaq ümidini hələ də itirmədiyini deyib. Onun sözlərinə görə, Kataloniya klubunda ümid edirlər ki, “Atletiko Madrid”in baş direktoru Migel Anxel Gil Marin mövqeyini dəyişərək Alvarezin satışına razılıq verə bilər.

Alvarez daha əvvəl “Atletiko”dan ayrılmaq istədiyini açıqlasa da, Madrid klubunun rəhbərliyi onun satışına qarşı çıxıb.

Gil Marin dəfələrlə bildirib ki, klub hücumçunu satmaq niyyətində deyil və hətta yüksək məbləğli təkliflərdən imtina edib.

“Barselona” isə Alvarezin Kataloniya klubunda oynamaq istəyindən yararlanaraq transferi reallaşdırmağa çalışır. Bununla belə, “Atletiko” rəhbərliyi “Barselona”nı transfer məsələsində kluba qarşı media vasitəsilə təzyiq göstərməkdə ittiham edib.

Beləliklə, Alvarez uğrunda mübarizəyə “Arsenal”ın da qoşulmasına baxmayaraq, futbolçunun prioritetinin dəyişmədiyi və onun “Barselona”ya keçmək istədiyi bildirilir.

Publika.az