Ukrayna və Polşa DÇ üçün birləşir - Boş yer axtarılır

Ukrayna və Polşa 2042 və ya 2046-cı illərdə futbol üzrə dünya çempionatına birgə ev sahibliyi etmək üçün mümkün namizədliyi nəzərdən keçirirlər.

Publika.az “Politico”ya istinadla xəbər verir ki, bu barədə Ukraynanın gənclər və idman naziri Matvey Bednıy və Polşa mənbələri məlumat verib.

Matvey Bednıy bildirib ki, turnirin keçirilməsi üçün ən yaxın boş pəncərə 2040-cı illərə təsadüf edir. Buna görə də mümkün namizədliyə hazırlığa indidən başlamaq lazımdır. Nazir xatırladıb ki, Ukrayna və Polşa daha əvvəl 2012-ci ildə futbol üzrə Avropa çempionatına birgə ev sahibliyi ediblər.

Bununla belə, hələlik rəsmi namizədlik müraciəti yoxdur. Bednıyın sözlərinə görə, belə bir təşəbbüs idman ictimaiyyəti və ya futbol federasiyalarından gəlməlidir. Polşalı mənbə isə dünya çempionatının birgə keçirilməsi imkanının Qdanskda Ukraynanın bərpasına həsr olunmuş konfransda da müzakirə edildiyini bildirib.

Qeyd edək ki, futbol üzrə 2030-cu il dünya çempionatı İspaniya, Portuqaliya və Mərakeşdə, 2034-cü il mundialı isə Səudiyyə Ərəbistanında keçiriləcək. 2038-ci il dünya çempionatına ev sahibliyi edəcək ölkə və ya ölkələr hələ müəyyənləşmədiyindən Ukrayna və Polşa daha uzaq perspektivə yönəlib.

Müəllif: Adəm