Nüvə hücumundan sağ çıxdı, beysbol əfsanəsinə çevrildi - 86 yaşında öldü

Hiroşimanın atom bombalanmasından sağ çıxan koreya-yapon beysbol əfsanəsi İsao Harimoto Tokioda 86 yaşında vəfat edib.

Publik.az xəbər verir ki, “Hit maşını” ləqəbi ilə tanınan Harimoto Yaponiya beysbolu tarixində ən çox hit vuran oyunçudur. O, 23 mövsümlük karyerası ərzində 3085 hit qeydə alıb. Harimoto Yaponiya Peşəkar Beysbol Liqası (NPB) tarixində 3000 hit həddinə çatan yeganə oyunçudur.

O, həmçinin 504 homerun vurub və 319 baza oğurlayıb. Bununla da NPB tarixində ən azı 500 homerun və 300 oğurlanmış baza göstəricilərinə çatan yeganə oyunçu olub.

Major League Baseball (MLB) tarixində yalnız üç oyunçu eyni göstəriciyə nail olub: Barri Bonds, Villi Meys və Aleks Rodriqes.

18 dəfə “All-Star” seçilən Harimoto 1962-ci ildə “Toei Flyers” klubunun ilk “Japan Series” çempionluğunu qazanmasına kömək edib. O, 1990-cı ildə Yaponiya Beysbol Şöhrət Zalına daxil edilib.

Yaponiya beysbolunun iki şöhrət zalından biri olan “Golden Players Club” yaydığı açıqlamada “Meikyukai”nin bütün üzvlərinin İsao Harimotoya uzun illər ərzində göstərdiyi möhtəşəm xidmətə görə dərin hörmət və minnətdarlığını ifadə etdiyini və onun vəfatından sonra səmimi başsağlığı verdiyini bildirib.

Doğum adı Canq Hun olan Harimoto böyük uğurlar qazanmaq üçün ciddi maneələri dəf edib.

O, 1940-cı ildə Yaponiyanın Koreyanı idarə etdiyi dövrdə ölkəyə köçmüş koreyalı valideynlərin ailəsində Hiroşimada anadan olub. Ömrü boyu Yaponiyada yaşayıb və yapon adını qəbul etsə də, vətəndaşlığı yalnız sonrakı illərdə əldə edib.

Uşaqlıqda baş verən qəza nəticəsində sağ əlindən ciddi yanıq xəsarətləri alıb.

Baş barmağı və şəhadət barmağının hərəkət imkanları məhdudlaşıb, digər üç barmağı isə bükülü vəziyyətdə qalıb. Buna görə Harimoto sol əli ilə top atmağa və vurmağa məcbur olub.

Bükülü vəziyyətdə qalan sağ əlinə isə topu tuta bilməsi üçün xüsusi hazırlanmış əlcək taxıb.

Lakin onun ümumiyyətlə beysbol oynamaq imkanı qazanmaması da mümkündü.

Qəzadan bir il sonra, 1945-ci il avqustun 6-da Harimoto Hiroşimada olub. İkinci Dünya müharibəsinin son günlərində ABŞ şəhərin üzərinə atom bombası atıb.

Həmin vaxt beş yaşında olan Harimoto sağ-salamat xilas olub. O, 2011-ci ildə açıqlamışdı ki, bomba partlayarkən anası öz bədəni ilə onu və bacısını qoruyub. Digər bacısı isə sağ qalmayıb.

Harimoto sonradan möhtəşəm karyeraya imza atıb. 1959-cu ildə “Toei Flyers”ə qoşulan beysbolçu bu klubda 16 il çıxış edib, daha sonra “Yomiuri Giants” və “Lotte Orions” komandalarının formasını geyinib.

O, yeddi dəfə batting çempionu olub. Bunlardan dördünü 1967-1970-ci illərdə ardıcıl qazanıb. Bu göstəricini onilliklər sonra İçiro Suzuki də təkrarlayıb.

Harimoto 2752 oyunda iştirak etdikdən sonra 1981-ci ildə karyerasını başa vurub.

O, 1982-ci ildə Cənubi Koreyanın KBO beysbol liqasının yaradılmasına kömək edib. Daha sonra isə beysbol şərhçisi və ekspert kimi fəaliyyət göstərib.