Haalanddan derbi rekordu barədə etiraf: “Ağlımın bir küncündə qalmışdı”

“Mançester Siti”nin norveçli hücumçusu Erlinq Haaland İngiltərə Premyer Liqası tarixində Mançester derbilərinin ən məhsuldar futbolçusu olub.

Publika.az xəbər verir ki, 26 yaşlı forvard “Mançester Yunayted”lə oyunda vurduğu qolla derbidəki qol sayını 9-a çatdırıb. Bununla da Haaland Ueyn Runi və Serxio Aqueroya məxsus 8 qolluq rekordu geridə qoyub.

Haaland etiraf edib ki, sözügedən rekorddan əvvəlcədən xəbərdar olub və bu göstərici uzun müddət onun fikrində qalıb.

“Bu rekorddan xəbərim var idi, onun haqqında oxumuşdum. Ona görə də ağlımın bir küncündə qalmışdı. Bununla inanılmaz dərəcədə qürur duyuram. Bu, məni çox xoşbəxt edir, çünki hamımız bu matçın nə qədər xüsusi olduğunu bilirik”, deyə Haaland bildirib.

Norveçli futbolçunun rekord qırdığı qol matçın 60-cı dəqiqəsində vurulub. Gərgin mübarizədə Haaland cərimə meydançasında yaranan boşluqdan istifadə edərək topu qapıdan keçirib. Qol bir müddət VAR tərəfindən yoxlanılıb, lakin nəticədə hakim qərarı qüvvədə saxlayıb.

Haaland qol epizodunda xüsusi taktiki hesablamadan daha çox instinktlərinə güvəndiyini bildirib.

“Tamamilə instinktdir. Həmin anda nə etməli olduğumu hiss etməklə bağlıdır. Sadəcə topu qapıya göndərməyə və qapıçının çıxara bilməyəcəyi qədər yaxşı zərbə vurmağa çalışıram”, deyə hücumçu vurğulayıb.

Haaland həmçinin “Mançester Siti” azarkeşləri ilə münasibətindən danışıb. Onun sözlərinə görə, 2022-ci ildə Dortmund “Borussiya”sından İngiltərə klubuna keçdiyi gündən etibarən tərəfdarlarla xüsusi bağ formalaşıb.

Norveçli futbolçu Mançester derbisinin onun üçün həmişə xüsusi qarşılaşma olduğunu qeyd edib. Haaland bildirib ki, azarkeşlərin rəqabət atmosferi, zarafatları və komanda uğrunda mübarizə ruhu bu matçları daha da fərqli edir.

Haalandın “Mançester Yunayted”ə qarşı Premyer Liqadakı 8 oyunda 9 qola çatması onun derbidəki məhsuldarlığının miqyasını bir daha göstərib.