“Xiaomi” yeni noutbukunu təqdim etdi - FOTO

Son günlər sürətlə bazara daxil olan Çinin “Xiaomi” şirkəti bu dəfə də özünün yeni nəsil noutbuklarını təqdim edib.

Publika.az xəbər verir ki, təqdim edilən “Mi Notebook” -lar yeni versiyada və ən son texnologiyalarla təchiz edilib. Səkkizinci nəsil “Intel Core” prosessorları, “NVIDIA” qrafikası üzərində qurulan model ayrıca rəqəmli bloka malik tamölçülü klaviatura ilə təchiz edilib.

Yeni “Xiaomi Mi Notebook” 15,6 düym diaqonallı “Full HD” ekran, “Core i5” və ya “Core i7” prosessorları ilə təchiz olunub. “Core i5” versiyası 4 və ya 8 giqabaytlıq operativ yaddaşa malikdir. Versiyadan asılı olmayaraq 128 giqabaytlıq bərkcisimli toplayıcı və 1 terabaytlıq sərt disk təklif edilir. Bundan başqa, qurğuda 2 giqabaytlıq videoyaddaşa malik “NVIDIA GeForce MX110” qrafikası, iki “USB 3.0”, bir “USB 2.0”, bir “HDMI”, “Ethernet” portları və qulaqcıq üçün 3,5 millimetrlik çıxış, “SD” yaddaş kartları üçün slot nəzərdə tutulub.

“Xiaomi Mi Notebook” noutbukunun (Core i5 + 4 giqabaytlıq RAM +128 giqabaytlıq SSD+ 1 terabaytlıq HDD) ilkin olaraq başlanğıc qiyməti 582 dollar təyin edilib. Əlavə 4 giqabaytlıq operativ yaddaşlı modellər 655 dollardan, “Core i7” və 8 giqabaytlıq quraşdırılmış yaddaşa malik modellər isə 727 dollardan başlayan qiymətlərlə təklif edilib.

“Xiaomi Mi Notebook” noutbuklarının satışına avqust ayının 28-dən etibarən başlanılması planlaşdırılır.

Könül