Azərbaycanlı rəssama medal verdilər

Azərbaycanın əməkdar rəssamı, UNESCO-nun Beynəlxalq Rəssamlar Federasiyasının üzvü Sakit Məmmədov beynəlxalq mükafata layiq görülüb.

Publika.az xəbər verir ki, rəssam dünya birliyi qarşısında xidmətlərinə görə “Motsart” medalı ilə təltif olunub.

Avropa Təbiət Elmləri Akademiyasının direktoru Vladimir Tıminskinin təqdim etdiyi bu mükafatı rəssam bütövlükdə Azərbaycan təsviri sənətinə verilən qiymət kimi dəyərləndirib.

Qeyd edək ki, S.Məmmədovun əsərləri dünyanın bir çox görkəmli siyasi xadimlərinin şəxsi kolleksiyalarında, Vatikan muzeyində, “Opera” qalereyasında (Sinqapur), Bakı Müasir İncəsənət və Azərbaycan Milli İncəsənət muzeylərində saxlanılır. Onun əsərləri dünyanın bir çox nüfuzlu qalereyalarında sərgilənir, ABŞ, Almaniya, Fransa, İtaliya, Türkiyə, Belçika, Rusiya, Çexiya, İsveç, Polşa, Avstriya, Macarıstan, Avstraliya və digər ölkələrdə təşkil edilən sərgilərdə nümayiş olunur.

Prezident İlham Əliyev məhz onun əsəri olan Roma Papası II İohann Pavelin portretini Azərbaycanın adından Vatikana hədiyyə edib.

Cəvahir