Efirdən qərib düşən Azər Qəribov AzTV-də - VİDEO

Bir müddətdir verilişləri televiziya ekranlarından qərib düşən tanınmış jurnalist Azər Qəribov AzTV ilə əməkdaşlığa başlayıb.

Publika.az xəbər verir ki, AzTV-nin Sosial media və ictimaiyyətlə əlaqələr şöbəsinin məlumatına görə, səfər etdiyi ölkələrdə başına gələn əhvalatları tamaşaçıya yumor dili ilə çatdıran jurnalistin verilişi “Oralar” adı ilə yayımlanacaq.

2003-cü ildən səyahət verilişləri aparan Azər Qəribovun AzTV-də efirə gedəcək proqramında yeniliklər olacaq.

Bu barədə açıqlama verən jurnalist deyib ki, veriliş videobloq formatında çəkiləcək: “Əvvəllər kadrarxası mətnlərə üstünlük verilirdisə, indi daha çox yerindəcə söhbətlər olacaq. Əvvəllər musiqiyə daha çox önəm verilirdi, amma indi elə olmayacaq”.

Azər Qəribov efirə qayıdışının ilk səfərini Türkiyənin Antalya bölgəsinə edib: “Məqsədimiz Antalyada payız-qış aylarında istirahəti göstərməkdir”, - jurnalist qeyd edib.

“Oralar”ın ayda 2 yeni buraxılışının efirə verilməsi nəzərdə tutulur. İlk buraxılış fevralın 5-i saat 16:30-da yayımlanacaq.