Müğənni Nəfəs: “Keçmiş həyat yoldaşımı heç vaxt qəbul etmərəm” - MÜSAHİBƏ

Publika.az müğənni Nəfəsin müsahibəsini təqdim edir:

- Nəfəs xanım, zaman adlı bir “at” sizi haradan götürüb haraya apardı?

- Zaman məni keçmişdən götürüb gələcəyə doğru apardı.

- Keçmişinizdə nə var idi?

- Keçmişdə çox çətinliklərim olub. Amma indi o çətinliklər arxada qalıb. İndi öz ayaqlarım üzrəində dayanmağa və gələcəyə doğru yaxşı addımlar atmağa çalışıram.

- İndi olduğunuz yerdən razısınızmı?

- Qısa zaman kəsiyində bu qədər uğur əldə etmişəmsə, razı olmaya bilmərəm.

- Öz əlinizlə nə vaxtsa baltalanmısınızmı?

- Belə məqamlar çox olub. Bunu indi də yaşayıram. Düşüncələrimdə çox səhv etmişəm.

- Həmin məqamlarda intihara cəhd etmisinizmi?

- Bəli, bir neçə dəfə intihar etməyə cəhd etmişəm. Amma sonra fikrimdən daşınmışam.

- Sizi intihar etməyə sövq edən nə idi?

- Həm maddi, həm də mənəvi problemlərdən çox yorulmuşdum.

- İndi məşhursunuz. İnsanlar sizə yaxınlşanda hansı hisləri keçirdirsiniz?

- Bu hal mənə çox xoş olur. Həmin an özümlə və sənətimlə qürur duyuram. Amma pis baxışlar olanda çalışram ki, fikir verməyim.

- Kişilərin sizə baxmağı sizi narahat edirmi?

- Təbii ki, narahat etmir. Hansı qadın kişilərin diqqət mərkəzində olmağını istəməz ki?

- Daha çox nə ilə diqqət çəkirsiniz?

- Məncə, sadəliyim və təbəssümümlə daha çox diqqət çəkirəm.

- Özünüzlə dartıb apara bilmədiyiniz bir “yük” varmı?

- Mən həyatın o qədər “yük”ünü daşımışam ki, artıq öyrəşmişəm. İndi heç bir “yük”ü dartıb aparmaq mənə çətin gəlmir.

- Şüşəsindən çölə həsrət dağılan pəncərələrdən çox baxmısınız?

- İnsan bəzən azadlıqda olsa da, pənəcərədən baxdıqda nələrisə, kimlərisə gözləyir. Ümumiyyətlə, mən xəyalpərəst insanam. Çox xəyallar qurmuşam.

- Konkret desək, kimi gözləmisiniz?

- Mən ailəmə çox bağlı insan olmuşam. Təəssüf ki, alınmadı. Ayrıldıq.

- Niyə ayrıldınız?

- Bilirsiniz, müəyyən şeylərə göz yummaq olur. Amma bir yerə qədər. İnsanın səbrinin tükəndiyi anlar var.

- Siz məşhur olduqdan sonra həmin insan sizinlə yenidən ailə qurmaq istədimi?

- Bir neçə dəfə bunu hiss etmişəm. Amma olsa da, mən heç vaxt qəbul etmərəm.

- Kaş ki, gözüm kor olardı, onu görməyəydim və ya nəyi?

- Elə insanlar olur, adam deyir, kaş ki, onu görməyəydi.

- Sizin üçün o insan olubmu?

- Olub. Həyatımda biri var idi, amma artıq yoxdur.

- İkinci dəfə ailə qurmaq fikriniz varmı?

- Belə bir fikrim yoxdur. Bu gedişlə olmağına da inanmıram.

- Dodağınızdan qəlbinizə axıb gedən nə oldu?

- Peşmançılıqlar… Yenə də deyirəm ki, səhvələrim çox olub.

- Kiminsə qazdığı quyuya düşmüsünüzmü?

- Əvvəllər çox düşürdüm. Hətta sənət yoldaşlarımın bəziləri məni sənətdən uzaqlaşdırmaq istəyirdi.

- Göz yaşlarına inanırsınızmı?

- Mənim altıncı hissim güclüdür. İnsana baxanda onu nə düşndüyünü, hansı hislər keçirtdiyni yaxşı bilirəm.

- Əliniz ətəyinizdə çox qalıb?

- Çox qalıb. Çünki bütün çətinliklərə tək sinə gərməyə çalışmışam.

- Yatsanız, yuxunuza nə girməzdi?

- Aciz olmağım… Bir çox məsələdə aciz qalıram.

- Sizin üçün nə samanlıqda iynə axtarmaq kimi bir şeydir?

- Düzgün insanları tapmaq çox çətindir.

- Deyəsən, çox kövrək insansınız…

- Çox kövrəyəm. Bu da məni çox yorur və aciz edir.

- Balaca bir qızcığazın gəlinciyini əlindən tez aldılar?

- Mənim heç vaxt gəlinciyim olmayıb (kövrəlir). Çünki onu almağa imkanımız yox idi. Böyüdükdən sonra özümə gəlincik aldım.

- Maddi ehtiyaca görə sizə dəyərli olan nəyinizisə satmısınız?

- Satmamışam. Amma ehtiyaca görə dükanda satıcı işləmişəm.

- Nəfəsin bir nəfəs qədər özünə yaxınlaşdırıb sonradan uzaqlaşdırdığı insan kimdir?

- Atam. Onu nəfəsimə çəkdim, amma mən istəmədən məndən uzaqlşadı. Rəhmətə getdi.

- Mən axı haradan biləydim ki,.. Bu fikri özünüz tamamlayın, zəhmət olmasa.

- Mən axı haradan biləydim ki, bu qədər çox sevilərəm.

Cavidan Abdullayev