Bir dəfə qapımı döyüb deməmisiniz ki, ay Allahverdi, niyə belə fağır və üzgünsən? - VİDEO

"Deyirlər ki, aləmi qatmısan biri-birinə, neyləmisən sən?! Elə sənət yoldaşlarım da dedi ki, bu nə biabırçılıqdır?"

Publika.az xəbər verir ki, bu sözləri Baku TV-yə müsahibəsində aktyor Allahverdi Yolçuyev deyib.

O, niyə məhz corab satdığını izah edib:

“Corab satmaq ayıb bir şey deyil. Keçən dəfə də dedim, qonşum da alma satır. Əsas odur ki, oğurluq etmir. Mən də corab satıram, heç kəsdən oğurluq etmirəm. Mənə elə gəlir ki, corab satmaq biznesin inkişafı deməkdir. Büdcəm ona çatdığı üçün bunu edirəm. Açığı, inanmazdım ki, məsələ bu qədər ajiotaj yarada bilər. İndi də mənə qəribə gəlir yazılanlar”.

O, həmkarlarının da onu tənqid etdiyini bildirib:

“Deyirlər, aləmi qatmısan biri-birinə, neyləmisən sən?! Elə sənət yoldaşlarım da dedi ki, bu nə biabırçılıqdır? Başa sala bilmədim ki, əzizim, sən nə qədər maaş, təqaüd alırsan? Mən 336 manat 58 qəpik pensiya alıram. Bir dəfə qapımı döyüb deməmisiniz ki, ay Allahverdi, səni efirdə gördüm, küçədə gördüm, niyə belə fağır və üzgünsən? Al bu 100 manatı, 50 manatı, ən pis halda 10 manatı, bir tikə çörək ye. Bunu deməmisiniz, amma tənqid edirsiniz. O da çox asan bir şeydir. Adamı "balta"yla vurub öldürürlər. Çünki yıxılana balta vurmaq çox asandır”.(Yenisabah.az)