Məşhur müğənni: “Düşünürdüm ki, dəli oluram”

Psixi sağlamlıq problemlərindan danışan Hollivud ulduzu Cennifer Lopez etiraf edib ki, "daxili panik hücumlar" onu dəlilik həddinə çatdırıb.

Publika.az xəbər verir ki, pop kraliçası bu barədə On the Jlo adlı məlumat saytında danışıb.

“Həyatımda elə bir dövr olub ki, gün ərzində üç-beş saat yatmışam. Gecə-gündüz çəkiliş meydançasında olurdum, həftə sonları isə əyləncələr keçirir, videolar çəkirdim. 20 yaşım var idi, yenilməz olduğumu düşünürdüm. Bir gün çəkilişdə dəhşətli stress yaşadım. Stress və yuxusuzluq məni iflic etdi. Panik hücum zamanı sanki yerimdə donub qaldım, heç nə görmürdüm. Düşündüm ki, artıq dəli olmuşam.

Həkim dedi ki, yox, sən dəli deyilsən, sadəcə dincəlmək lazımdır, ilk növbədə yaxşı yatmalısan. Gündə ən az 7-9 saat yatın, kofeindən imtina edin, fiziki fəaliyyətinizə nəzarət edin. Həmin əhvalatdan sonra anladım ki, bədəndə enerji tükənməsi ciddi fəsadlara səbəb ola bilər. Elə o andan sağlam həyat tərzinə səyahətim başladı” , - ulduz qeyd edib.