6 yaşlı uşaq valideynlərini "soydu"

Altı yaşlı uşaq atasının telefonundan yemək sifariş etmək üçün 900 dollar xərcləyib.

Publika.az xəbər verir ki, hadisə Miçiqan ştatında baş verib. "LADBible"ın yazdığına görə, altı yaşlı Meyson valideynləri işlə məşğul olarkən atasının telefonunu götürüb. Oğlunun onlayn oyun oynadığını zənn edən ata sonradan görüb ki, oğlan yeməklərin çatdırılması proqramına daxil olub və səbətə 900 dollarlıq mal əlavə edib.

Uşağın atası bildirib ki, hadisədən çox gec xəbər tutub.

"Maşının dayandığını gördüm, sonra qapının zəngi çalındı. Sürücü böyük bir çanta gətirmişdi. Bir neçə dəqiqədən sonra başqa bir kuryer ərzaq məhsulları çatdırdı, onun ardınca başqa bir kuryer gəldi. Telefonuma yeməyiniz hazırlanır və çatdırılır mesajları gəlməyə başladı. Bank hesabıma baxanda gördüm ki, boşdur”, – amerikalı əlavə edib.

Atasının dediyinə görə, Meyson nə etdiyini tam başa düşməyib. Xoşbəxtlikdən bank əməliyyatlardan birini fırıldaq kimi qeyd edib, 400 dollarlıq digər sifariş isə rədd olunub.

Ailənin hekayəsi virallaşdıqdan sonra çatdırılma proqramı ataya pulunu ödəmək üçün 1000 dollar promo kodu verib.

Aytən Məftun