Stalinin keçmiş daçası bu qiymətə satılır

Stalinin satışa çıxarılan keçmiş daçasının başlanğıc qiyməti məlum olub.

Publika.az xəbər verir ki, rieltor, daşınmaz əmlak üzrə ekspert Natalya Pereskokova "Lenta.ru"-ya müsahibəsində Sovet lideri İosif Stalinin hərraca çıxarılan daçasının mümkün qiyməti barədə məlumat verib. O qeyd edib ki, hərracın bir milyard rublla başlaması ehtimalı var.

Mütəxəssis belə baha qiymətin obyektin mədəni-tarixi dəyəri ilə bağlı olduğunu bildirib və onun keçmişini xatırladıb.

“Bu obyektin niyə alındığını anlamaq vacibdir. Düşünürəm ki, binanın bərpaya ehtiyacı var. Bina çox zədələnib, ona görə də yenidən tikilməli olacaq. Belə obyektləri adətən iri sahibkarlar, iş adamları alır. Fərdi şəxslər adətən bu cür binaları almır.

Qeyd edək ki, ki, Moskva yaxınlığındakı Veşkidə, Mıtişi rayonunda İosif Stalinin 1930-cu illərin əvvəllərində yaşadığı Lipki malikanəsi satışa çıxarılıb. Bildirilir ki, mülkdəki binaların ümumi sahəsi təxminən dörd min kvadratmetrdir.

Əmlak 19-cu əsrdə tikilib və tacir Aleksandr Alekseyev orada məskunlaşıb. Daha sonra kompleks milliləşdirilərək internat məktəbinə verilib. Stalin 1932-ci ildə oraya köçüb. Bir müddət sonra mülk reabilitasiya mərkəzinin yerləşdirilməsi üçün istifadə edilib və sonra müəssisə yenidənqurma üçün bağlanıb.

Mehti Kamiloğlu