Ali Məhkəmə bu gün eynicinslilərin nikahını qanuniləşdirəcək - Hökumət etiraz edir

Hindistan Ali Məhkəməsi eynicinsli nikahların tanınması ilə bağlı hökm çıxaracaq.

Publika.az xəbər verir ki, Hindistanın ali məhkəməsi bu gün eynicinsli nikahların hüquqi tanınması barədə qərar çıxaracaq. Bu barədə "Reuters" agentliyi məlumat yayıb.

Ali Məhkəmənin internet saytında bazar ertəsi axşam saatlarında yayılan bir mesajda hökmün çərşənbə axşamı günü veriləcəyi bildirilib.

Hindistan hökuməti eynicinsli nikahların tanınması çağırışlarına qarşı çıxıb, onları "şəhər elitasının baxışları" adlandırıb və parlamentin problemi müzakirə etmək üçün uyğun platforma olduğunu bildirib.

Hökumətin bəyanatında həmçinin deyilir ki, bu cür nikahlar “ər, arvad və uşaqlardan ibarət hind ailəsi anlayışı ilə uyğun gəlmir”.

Hindistanın lezbiyan, gey, biseksual, transseksual və queer (LGBTQ) icmasının üzvləri 2018-ci il məhkəmə qərarına baxmayaraq ayrı-seçkiliklə üzləşdiklərini və eynicinsli nikahlara hüquqi dəstəyin olmamasının onların konstitusiya hüquqlarını pozduğunu deyirlər.

Qeyd edək ki, Asiyada eynicinslilərin nikahına hazırda yalnız Tayvan və Nepalda icazə verilir.

Mehti Kamiloğlu