MDB

Dünya liderləri Azərbaycan pavilyonunda - FOTO

5 Avqust 2025 23:00

BMT-nin Dənizə çıxışı olmayan inkişaf etməkdə olan ölkələr üzrə konfransının proqramı çərçivəsində dövlət başçıları Mərkəzi Asiya ölkələrinin və Azərbaycanın milli günlərinə həsr olunmuş tədbirlərdə iştirak ediblər.

Publika.az xəbər verir ki, bu barədə Özbəkistan Prezidentinin mətbuat xidməti məlumat yayıb.

Bildirilib ki, milli günlər region ölkələrinin xalqlarının zəngin mədəni irsini nümayiş etdirmək, mehriban qonşuluq əlaqələrini möhkəmləndirmək və mədəni-humanitar əməkdaşlığı genişləndirmək məqsədi ilə təşkil edilir.

Milli pavilyonlar, o cümlədən adət-ənənələrin, sənətkarlığın, mədəniyyət, incəsənət və turizm sahəsində müasir nailiyyətlərin ekspozisiyaları təqdim olunub. Qastronomik təqdimatlar və kulinariya ustad dərsləri də təşkil olunub.

Özbəkistanın ənənəvi həyətində qurulmuş milli elementləri olan “xovli” pavilyonu ziyarətçilərdə parlaq təəssürat yaratdı.

Tədbir qarşılıqlı anlaşmanın möhkəmlənməsinə və Mərkəzi Asiya haqqında sülh, sabitlik və firavanlıq məkanı kimi müsbət təsəvvürün formalaşmasına töhfə verərək regional kimliyin və mədəni müxtəlifliyin növbəti nümunəsinə çevrildi.

Hüseyn İbadlı