Məmurun villasında milyonluq sərvət tapıldı - Qalmaqallı detallar

Rusiyanın hərbi-sənaye nəhəngi “Rostex”lə əlaqəli yüksək vəzifəli şəxslə bağlı qalmaqallı detallar üzə çıxıb.

Publika.az xəbər verir ki, İspaniya hüquq-mühafizə orqanları “Rusiya Helikopterləri” holdinqinin rəhbəri Nikolay Kolesovla əlaqəli villalarda aparılan axtarışlar zamanı böyük həcmdə pul və qiymətli əşyalar aşkar edib.

Məlumata görə, Mayorkada yerləşən elit daşınmaz əmlaklarda keçirilən əməliyyat çərçivəsində hüquq-mühafizə orqanları aşağıdakıları aşkarlayıb:

- təxminən 300 min avro nağd pul (mebellərdə gizlədilmiş formada)

- bahalı saat və zinət əşyaları, o cümlədən yüksək dəyərli “Rolex” modelləri

- “Ferrari”, “Bentley”, “Range Rover” və BMW daxil olmaqla 6 lüks avtomobil

- “Beretta” markalı odlu silah

Axtarışlar çirkli pulların yuyulması, sanksiyalardan yayınma və mütəşəkkil cinayət fəaliyyəti ilə bağlı istintaq çərçivəsində aparılıb. Əməliyyat zamanı Kolesovun aktivlərini idarə etdiyi iddia olunan bir neçə şəxs də saxlanılıb.

Bildirilir ki, hələlik rəsmi ittiham irəli sürülməyib.

Qeyd edək ki, Nikolay Kolesov “Rusiya Helikopterləri” holdinqinə rəhbərlik edir və vaxtilə Amur vilayətinin qubernatoru olub. O, həmçinin “Rostex” rəhbəri Sergey Çemezovla yaxın əlaqələri ilə tanınır. Sergey Çemezov isə Kremlə ən yaxın oliqarx məmurlardan sayılır.

Araşdırmalarda iddia olunur ki, Kolesov müxtəlif sxemlər vasitəsilə onlarla müdafiə sənayesi müəssisəsini və digər aktivləri özünə və yaxınlarına rəsmiləşdirib. (Musavat.com)