Lukaşenko Trampa məsləhət verib: Ona dedim ki, bu işə qarışma!

Belarus prezidenti Aleksandr Lukaşenko ABŞ prezidenti Donald Trampla son təmasları barədə sensasiyalı açıqlama verib. Lukaşenko Trampa İsrail və İran arasındakı münaqişəyə birbaşa müdaxilə etməməyi məsləhət gördüyünü bildirib.

Publika.az xəbər verir ki, bu barədə Belarusun "BelTA" agentliyi məlumat yayıb.

Lukaşenkonun sözlərinə görə, o, ABŞ tərəfinə İsrailə müstəqil hərəkət etmək imkanı verməyi tövsiyə edib.

"İsrail İranla müharibə etmək istəyirdi, qoy etsin. İmkan verin vuruşsunlar, siz niyə ora müdaxilə edirsiniz?" - deyə Belarus lideri Trampa müraciət edib.

Lukaşenko iddia edir ki, rəsmi Vaşinqton artıq bu xətti izləməyə başlayıb. O qeyd edib ki, ABŞ-ın ölkə xaricindəki münaqişələrdə iştirakı itkilərə səbəb olur və bu, cəmiyyətdə ciddi narazılıq yaradır. Belarus liderinin fikrincə, ABŞ vətəndaşlarının üçdə ikisi bu cür hərbi müdaxilələri dəstəkləmir.

Lukaşenko həmçinin Qərb ölkələrinin müharibələri tez-tez "özgə əlləri ilə" apardığını diqqətə çatdırıb.

Müəllif: Adəm