Suriya konstitusiyasına dair Cenevrə danışıqları təxirə salındı

Cenevrədə Suriya konstitusiya komitəsinin növbəti iclası təxirə salınıb.

Publika.az xəbər verir ki, bu məlumatı BMT Baş katibinin Suriya üzrə xüsusi nümayəndəsi Heyr Pedersen təsdiqləyib. O, danışıqların təxirə salınmasının səbəblərini açıqlamayıb.

İsveçrə mətbuatının məlumatına görə, Suriya hökumətini dəstəkləyən Rusiya tərəfi hələ iyun ayında danışıqların məkanının dəyişdirilməsi təklifini irəli sürüb. Buna səbəb kimi İsveçrənin öz neytrallığını itirməsi göstərilib.

İlkin olaraq iyulun 25-dən 29-dək nəzərdə tutulan danışıqlarda Suriyanın hökumət, müxalifət və vətəndaş cəmiyyətinin təmsilçiləri sayca doqquzuncu dəfə bir araya gəlməli idilər. Konstitusiya komitəsinin əsas işi artıq 11 ildən bəri vətəndaş müharibəsi içərisində olan Suriyanın böhrandan çıxarılması üçün yeni konstitusiyanı hazırlamaqdır.

2019-cu ildən aparılan danışıqlarda tərəflər arasında əsaslı yaxınlaşma əldə olunmayıb. Növbəti danışıqların məkan və zamanı barədə hələlik açıqlama verilmir.