Azərbaycan dünya üçün tolerant, multikultural bir ölkədir - ŞƏRH

“Azərbaycan Respublikasının Prezidenti İlham Əliyevin fəaliyyəti istər ordu quruculuğu, istərsə struktur, demokratik islahatlar olsun, təkcə Azərbaycan dövlətinin milli maraqları çərçivəsində məhdudlaşmır. Bu, bütövlükdə, region və dünya üçün atılan nümunəvi addımlardır”.

Bu sözləri Publika.az-a açıqlamasında Milli Məclisin Aqrar siyasət komitəsinin üzvü Aydın Hüseynov deyib.

Millət vəkili bildirib ki, İlham Əliyevin həyata keçirdiyi siyasətdə, ilk növbədə, Azərbaycanın milli və dövlətçilik maraqları yüksək səviyyədə qorunur: “Azərbaycan dövlətinin milli maraqları dünyaya inteqrasiya fonunda, qonşu dövlətlərlə - Ermənistan istisna olmaqla, dünya dövlətləri ilə sıx əməkdaşlıq üzərində, demokratik prinsiplər əsasında qurulub. Eyni zamanda, İlham Əliyevin apardığı daxili siyasətlə yanaşı, xarici siyasəti də təkcə Azərbaycanın deyil, digər ölkələrin də maraqları qarşılıqlı fayda əsasında qurulur. Bu gün Əliyevin ölkə iqtisadiyyatı üçün təməlini qoyduğu regional əhəmiyyətli layihələr: TANAP, Bakı-Tbilisi-Qars dəmiryolu, TAP, Cənub Qaz Dəhlizi, Xəzər dənizinin statusunun müəyyənləşdirilməsi və bu kimi böyük işlər onun prinsipial mövqeyinin nəticəsində əldə olunub".

Aydın Hüseynov qeyd edib ki, bu layihələr iqtisadi səmərə verməklə yanaşı, xalqları bir-birinə yaxınlaşdırır, mədəniyyətləri bir-birinə qovuşdurur: "Azərbaycan dünya üçün eyni zamanda, tolerant, multikultural bir ölkədir. İlham Əliyevin həyata keçirdiyi siyasətin əsasında bu faktorlar dayanır. İstər ordu quruculuğu sahəsində olsun, istərsə struktur, demokratik islahatlar olsun, təkcə Azərbaycan dövlətinin milli maraqları çərçivəsində məhdudlaşmır. Bu, bütövlükdə, region üçün, dünya üçün atılan nümunəvi addımlardır. Prezidentimizin apardığı siyasət, əlbəttə, dünyanın da diqqətini cəlb edir və İlham Əliyevin fəaliyyəti müsbət qiymətləndirilir”.