Paris merinin ikilistandart yanaşması... - Azər Badamov

“ATƏT-in Minsk Qrupunun həmsədrləri olaraq bu münaqişənin tənzimlənməsi üçün mandat almış ölkələr öz neytral mövqeyini qoruyub saxlamalıdır. Əgər onlar öz neytral mövqelərini qorumasalar, onlardan həmsədr olmaz”.

Publika.az xəbər verir ki, bunu Paris meriyasının qondarma “Dağlıq Qarabağ Respublikası”nı tanımağa hazırlaşması ilə bağlı danışan deputat Azər Badamov deyib.

Deputat qeyd edib ki, Fransanın mövqeyi əvvəldən bizə qarşı yönəlmişdi: “Sonra başa düşdülər ki, həmsədr ölkədir, neytral mövqedə dayanmalıdır. Bu günlərdə isə qatı ermənipərəst mövqeyi ilə tanınan Paris meri Anna İdalqo Dağlıq Qarabağın müstəqilliyini tanıyacağı ilə bağlı bəyanat səsləndirib”.

A.Badamov bildirib ki, əgər Dağlıq Qarabağın müstəqilliyini tanısaydılar, bu illər ərzində kimsə tanıyardı, kimsə tanımayıbsa, hamı Azərbaycanın beynəlxalq sənədlərdə tanınan sərhədlərinə hörmətlə yanaşıbsa, bundan sonra da belə davam edəcək:

“Hətta bu müharibənin iştirakçısı olan Ermənistanın özü belə Dağlıq Qarabağın müstəqilliyini tanımayıb. Belə olan halda Paris merinin səsləndirdiyi fikirlər onun ikiüzlü, ikilistandart yanaşmasını göstərir. Paris bir şəhər kimi Dağlıq Qarabağın müstəqilliyini tanısa da, o havanı dəyişmir. Artıq Azərbaycan öz haqq işini görüb, birgə üçtərəfli bəyannamə imzalanıb və bəyannamədə Ermənistan tərəf kimi məğlubiyyətə uğrayıb. Burada artıq Qarabağın status məsələsi öz əksini tapmayıb”.

Şamo Emin