Qərb məqsədinə çatdı - Politoloq Rusiyadakı vəziyyətdən danışdı

Demək olar ki, biz artıq Qərbin məqsədinə çatdığını müşahidə edirik. Çünki çox çalışırdı ki, hərbi əməliyyatları Rusiyanın daxilinə daşımaqla onun iqtisadiyyatını çökdürsün.

Bu sözləri Rusiyada baş verən son prosesləri Publika.az-a şərh edən politoloq İlyas Hüseynov deyib.

Politoloq hesab edir ki, muzdlu döyüşçülərdən ibarət "Vaqner" hərbi qruplaşmasının Rusiyadakı çevriliş cəhdi məhz Ukrayna və onun arxasında dayanan qərb dövlətlərinə sərf edən gedişatdır:

"Ümumilikdə, "Vaqner" Rusiyanın yaxın tarixində uğurlu bir model kimi özünü göstərsə də, hazırda yaşananlar ondan bu gün Rusiyaya qarşı əsas silah kimi istifadə olunmasına dəlalət edir".

Rostov və Voronejin mühasirədə olmasının vəziyyəti daha da qəlizləşdirdiyini vurğulayan İ.Hüseynov, bunun hətta Yevgeni Priqojinin dəstələrinin sözügedən ərazilərdə möhkəmlənməsi ilə nəticələnə biləcəyini də diqqətə çatdırıb.

"Əlbəttə ki, belə olacağı təqdirdə tərəflər arasında mübarizə daha kəskin xarakter alacaq", - siyasi ekspert əlavə edib.

Mehti Kamiloğlu