Bu layihə enerji təhlükəsizliyi üçün böyük təminat verir - Ekspert

“Star Rafineri” zavodunun açılışı Türkiyə-Azərbaycan arasındakı qardaşlıq tellərini daha da möhkəmləndirir. Bu layihə iki ölkənin dövlət başçılarının güclü siyasi iradəsini nümayiş etdirir”.

Publika.az xəbər verir ki, bu sözləri “Səs” qəzetinin baş redaktoru Bəhruz Quliyev Türkiyədə “Star Rafineri” neft emalı zavodunun açılışının əhəmiyyatindən danışarkən deyib.

Onun sözlərinə görə, iki dövlət Avrasiyanın enerji və nəqliyyat xəritəsini yenidən cızır:

“Məhz bu səbəbdən Azərbaycanın dövlət başçısı İlham Əliyev bəyan edib ki, bölgədə Türkiyə-Azərbaycan əməkdaşlığı olmadan heç bir təşəbbüs, heç bir layihə həyata keçirilə bilməz. Hər iki dövlət özünün iqtisadi və enerji imkanlarından, eləcə də geosiyasi mövqeyindən ikitərəfli və regional əməkdaşlığın genişlənməsi istiqamətində səmərəli surətdə istifadə edir. Bu gün bölgənin uzunmüddətli inkişaf strategiyasının müəyyənləşdirilməsində aparıcı rol oynayan və iki ölkə arasındakı münasibətlərin çox vacib elementlərindən olan neft və qaz kəmərləri təkcə regionda deyil, eləcə də bütün dünyada dövlətlərimizin nüfuzunu əhəmiyyətli dərəcədə artırıb”.

B.Quliyev bildirib ki, bu layihələr Azərbaycanın, Türkiyənin, eləcə də digər ölkələrin enerji təhlükəsizliyi üçün böyük təminat verir: “Eyni zamanda, iki dövlət arasında genişlənən əməkdaşlıq və strateji tərəfdaşlıq regionda sabitliyin göstəricisinə çevrilib”.