Qüdrət Həsənquliyev: “Əvəzedilməz kadrlar varsa, qanunu dəyişək”

“İctimaiyyəti narahat edən bir məqama diqqət çəkmək istərdim. Dövlətdə xidmət edənlərin yuxarı yaş həddi var. Amma buna bir çox hallarda əməl olunmur. Hər dəfə yaş həddinə çatanda xidməti müddəti artırılır. Bu, əksər ali dövlət xidmətlərinə aiddir. Məncə, bu məsələ barədə düşünməliyik”.

Publika.az xəbər verir ki, bunu parlamentdə çıxışı zamanı deputat Qüdrət Həsənquliyev səsləndirib.

O xatırladıb ki, “Məhkəmələr və hakimlər haqqında” qanunun müzakirəsi zamanı hakimlərin ömürlük təyin edilməsini təklif edib: “Ancaq mənim təklifim qəbul edilmədi. Məsələn, Ali Məhkəmənin sədri yuxarı yaş həddinə çatıb, amma xidməti davam etdirir. Biz qanunu pozmamalıyıq. Çünki bunu sadə insanlar görəndə də başlayır qanunu pozmağa. Əgər əvəzedilməz kadrlar varsa, onların yerinə başqa şəxslər tapmaq mümkün deyilsə, təklif edirəm qanunu dəyişək. Belə şəxslər varsa, ömürlük xidmət etsinlər. Sağlamlıqları imkan verdiyi müddətdə. Yəni ən pis qanunlar belə qanunu pozmaqdan daha yaxşıdır. Hesab edirəm ki, pis nümunələrdən imtina edilməlidir”.