Hərbi komissarı güllələyən şəxslə bağlı qərar verildi

Rusiyanın İrkutsk vilayətinin Ust-İlimsk şəhər məhkəməsi qanunsuz silah saxlamaqda, habelə şəhər hərbi komissarının həyatına qəsd etməkdə ittiham olunan yerli sakin Ruslan Zinin barəsində həbs qətimkan tədbiri seçib.

Publika.az xəbər verir ki, məhkəmənin mətbuat xidmətindən verilən məlumata görə, həmin şəxs iki ay həbsdə olacaq.

“Qətimkan tədbiri noyabrın 26-dək qüvvədədir. Bu müddət ərzində ibtidai istintaq tamamlana bilər”, - deyə şəhər məhkəməsindən aydınlıq gətirilib.

Qeyd edək ki, sentyabrın 26-da Ust-İlimskdə hərbi komissar Aleksandr Yeliseyev çağırış məntəqəsində ağır yaralanıb. Atəş açan 25 yaşlı yerli sakin dərhal yaxalanıb. Onunla bağlı regional istintaq komitəsi Rusiya Federasiyası Cinayət Məcəlləsinin iki maddəsi ilə cinayət işi açıb. Bunlar 222-ci (qanunsuz olaraq odlu silah, odlu silahın əsas hissələri, döyüş sursatı əldə etmə, başqasına vermə, satma, saxlama və ya gəzdirmə) və 317-ci (hüquq-mühafizə orqanı əməkdaşının həyatına qəsd) maddələridir.

Həmin gün hərbi komissar Ust-İlimsk şəhər xəstəxanasında əməliyyat olunub, ertəsi gün isə o, sanitar aviasiya ilə İrkutsk vilayət xəstəxanasına göndərilib. Onun vəziyyəti hazırda sabit ağır qiymətləndirilir.

Səxavət