Ərdoğan milli maraqların qorunmasında MASTER-KLASS keçir – Köçəryan

Bu gün keçirilən mətbuat konfransında Ermənistanın ikinci prezidenti Robert Köçəryan Qarabağ və Ermənistanın problemləri, təhlükəsizlik məsələləri, mümkün konsolidasiya və İranla münasibətlərdən danışıb.

Publika.az Qarabağ klanının və Ermənistanda revanşistlərin əsas fiqurlarından olan R.Köçəryanın dediyi əsas fikirləri onların mövqeyini öyrənmək, atacaqları addımları bilmək baxımından təqdim edir.

Qarabağ mövzusu yoxdur

Qarabağ mövzusu danışıqlar prosesində tamamilə yoxdur, söhbət Ermənistan-Azərbaycan münasibətlərinin tənzimlənməsindən gedir. Halbuki Ermənistanla Azərbaycan arasında münaqişə Qarabağ məsələsi üstündə idi. “Qarabağ respublikası” və “öz müqəddəratını təyinetmə” ifadələri Ermənistan Respublikası rəsmilərinin leksikonundan silinib, bu isə o deməkdir ki, bizim ciddi problemimiz var. Əgər belə davam edərsə, gələcək danışıqlar prosesi Bakı-Xankəndi (Köçəryan “Stepanakert” deyir) və müəyyən qədər Moskva formatında olacaq.

Qarabağ məsələsinin açarı Qarabağ xalqının (?) əlindədir, indi də belədir, 1992-ci ildə də belə idi. Onun bir hissəsi Ermənistan xalqının əlindədir: xalq hakimiyyəti Qarabağa yanaşmalarında əminlik tətbiq etməyə məcbur edəcək, ya yox? Əgər xalq döyüşməyə hazırdırsa, heç olmasa bütün bunları dayandırmaq imkanı hələ də var.

Bakıdan asılılıq artıb

Bu dövrdə Bakıdan asılılıq artıb. Yeni yolla yanaşı qaz xəttinin çəkilməməsi, elektrik dirəklərinin yerindən tərpənməməsi və rabitə kabelinin “köhnə yolda qalması” o deməkdir ki, Azərbaycan nə vaxt istəsə, Qarabağ üçün çıxılmaz vəziyyət yarada bilər və bu da olacaq.

Ermənistan haqqında

Hökumət Ermənistanın ərazi bütövlüyünü qoruya bilməyəndə biz dərin təhlükəsizlik böhranı yaşayırıq. Son vəziyyət də göstərdi ki, onlar bizim tərəfdaşlarımızı müqavilələrdə müəyyən edilmiş öhdəlikləri yerinə yetirməyə cəlb edə bilmirlər. Hökumət utopik “sülh erası”nın açılması tezisinə qapıldı və onun altında bir çox təhlükəsizlik məsələlərinə məhəl qoymadı.

Son hadisələr zamanı Bakı və Ankaranın rolu xeyli artıb, Türkiyə və Azərbaycana təsir rıçaqları azalıb.

Ermənistanda vəziyyət partlayıcıdır

Baş nazirin BMT-dəki çıxışı “sülh epoxası” üçün tərif idi. Əslində bu, məzmununa görə o demək idi ki, belə gözləntilər yoxdur və ondan sonra ölkə daxilində eyni lüğətlə danışmaq mənasızdır.

Dəfn zamanı mərhuma heç kim sağlamlıq arzulamır, bu səhifəni bağlamaq və başqa əsaslarla yeni səhifə açmaq lazımdır. Son hadisələr göstərdi ki, Ermənistanda vəziyyət partlayıcıdır, bir tərəfdən qərar qəbul etmək məcburiyyəti var, digər tərəfdən də bu qərarın Ermənistandakı vəziyyəti daxildən partlaya bilməsi təhlükəsi var. Bu, Ermənistanda 2018-ci ildən və xüsusən də 44 günlük müharibəni uduzduqdan sonra aparılan siyasətin qanuni nəticəsidir.

İranla münasibətlər

Ermənistan üçün ən zəif yer Zəngəzurdur (Köçəryan “Sünik” deyir). Bu, Azərbaycanın və Türkiyənin öz arzularını açıq şəkildə ifadə etdiyi sahədir.

Zəngəzur İran üçün də önəmlidir. Bu iki il ərzində biz İranla Zəngəzurda ən azı 2 hərbi təlim keçirməliydik, hansısa müqavilə bazası yaratmalıydıq, onlar Azərbaycan üçün ən böyük çəkindirici vasitə ola bilərdi, çünki İran milli maraqlarını güdürsə, barmaq yelləməklə dayandırıla biləcək dövlət deyil.

Biz qəti addımlar atmalıyıq. KTMT-dən çıxmaqla deyil, – bu, növbəti axmaqlıq olardı. Rusiyanı inandırmağa çalışmalıyıq. Çünki KTMT çərçivəsində silah-sursatın alınması üçün vacib olan müqavilələr var. Təhlükəsizlik sistemimizi yeni komponentlərlə təchiz etməliyik. Əminəm ki, bunu Rusiya tərəfinə izah etmək, bəlkə də yeni üçtərəfli format formalaşdırmaq mümkündür, çünki bu gün Rusiya İranla münasibətləri istiləşdirir.

Nə edilməlidir?

Aydındır ki, Rusiya Ermənistanla Azərbaycan arasında münaqişənin baş verməməsi üçün əlindən gələni edir və edəcək, lakin bunlar siyasi və diplomatik addımlar olacaq. Rusiyanın Azərbaycanla da müttəfiqlik münasibətləri var və bu vəziyyətdə Azərbaycana qarşı hərbi əməliyyatlara başlaya biləcəyini düşünmək sadəcə cəfəngiyyatdır. O baxımdan Ermənistanda anti-Rusiya əhval-ruhiyyəsinin inkişafı üçün yaxşı şərait yaradılıb, bu əhval-ruhiyyələrin “uzaqdan idarəetmə pultu” rəsmi Bakının əlindədir.

Ərdoğan “master klass” keçir

Aydın məsələdir ki, bu gün nə Rusiyanın, nə ABŞ-ın, nə də Fransanın Türkiyə və Azərbaycana heç bir təsir imkanı yoxdur. Ərdoğana isə ümumiyyətlə, heç kim təsir göstərə bilməz və o, milli maraqların qorunmasında “master klass” keçir. Bütün təzyiqlərə məhəl qoymayaraq Türkiyənin milli maraqları üçün doğru bildiyini edir.

Səxavət