İcra başçısı ərazidə sakinlərlə görüşdü - Fotolar

Azərbaycan Respublikasının Prezidenti cənab İlham Əliyevin vətəndaşların müraciətlərinin həlli ilə bağlı göstərişinə uyğun olaraq paytaxtın Yasamal rayonunda sakinlər üçün aprel ayı üzrə növbəti səyyar qəbul keçirilib.

Publika.az xəbər verir ki, Yasamal Rayon İcra Hakimiyyətinin başçısı Elşad Həsənovun sakinlərlə görüşü 1 nömrəli Bakı Tibb Kollecinin akt zalında baş tutub. Tədbirdə həmçinin Yasamal RİH-in vəzifəli şəxsləri, Bələdiyyə və MKTB-in rəhbər heyəti, SİƏD, xidmət sahələrinin nümayəndələri də iştirak ediblər.

Sakinləri salamlayan İcra Hakimiyyətinin başçısı Elşad Həsənov onlardan təklif və müraciətləri bərədə ətraflı məlumat verməyi xahiş edib. Öncə söz alan Yasamal rayonunun sakinləri Azərbaycan Respublikasının Prezidenti cənab İlham Əliyevə vətəndaşların hakimiyyət orqanları tərəfindən mütəmadi qəbuluna dair tapşırığına görə dərin minnətdarlığını ifadə ediblər. Daha sonra Yasamal rayonunun sakinləri istismar müddəti bitmiş evlərin söküntsü zamanı yaranan mübahisələrin araşdırılması, qəzalı evlərin taleyi, dövlət ehtiyacları üçün torpaqların satın alınması və kompensasiya məbləği, rayonda sahibsiz itlərə qarşı tədbirlərin görülməsi, mənzillərin təbii qaz ilə təchizatı, küçələrin işıqlandırılması, fərdi evin tikintisi, mənzil-məişət şəraitinin yaxşılaşdırılması, rayonda kanalizasiya sisteminin mövcud vəziyyəti və müxtəlif sosial məsələləri əhatə edən bir sıra mövzular qaldırıblar.

Qəbul zamanı İcra başçısı Elşad Həsənov müraciət edən rayon sakinlərini dinləyərək onların problemlərinin aradan qaldırılmasına dair rayondakı qurum və xidmət rəhbərlərinə bir sıra göstərişlər verib. RİH başçısı bəzi sakinləri fərdi qayda da dinləyib. Qəbul zamanı bəzi məsələlər yerindəcə həll edilib, icrası vaxt tələb edən müraciətlər isə araşdırılaraq həll edilməsi üçün icraata götürülüb.