Rusiya Qarabağ döyüşlərindən dərs götürəcək - Borisov açıqladı

Rusiya silahlanma proqramında Qarabağdakı PUA istifadə təcrübəsini nəzərə alacaq.

Publika.az xəbər verir ki, bu sözləri RBK-ya müsahibəsində Rusiya Baş nazirinin müavini Yuri Borisov deyib.

O bildirib ki, Qarabağdakı münaqişə pilotsuz nəqliyyat vasitələrinin nə qədər geniş istifadə olunduğunu göstərib.

Borisov əlavə edib ki, 2033-cü ilədək olan müddət üçün hazırlanmış proqramda pilotsuz nəqliyyat vasitələrinin istifadəsi təcrübəsi nəzərə alınacaq: “Pilotsuz nəqliyyat vasitələrinin istifadəsi ilə hərbi qarşıdurmaların təbiətinin necə dəyişdiyinə baxın. Bu, onsuz da, sabit tendensiyadır. Bunlar həm kəşfiyyat deməkdir, bu gün də zərbə silahlarıdır. Qarabağda necə işlədiyini də göstərdi”.

Onun sözlərinə görə, proqramda “Kalibr” raket sistemləri, “X-101” və digərləri də daxil olmaqla, Suriyada istifadə edilən yüksək dəqiqlikli silahların istismarı təcrübəsi nəzərə alınacaq.

Rusiyada 2018-2027-ci illər üçün mövcud silah proqramının həcmi 20 trilyon rubl təşkil edir. 2020-ci ilin iyul ayında Rusiya Federasiyası Maliyyə Nazirliyi koronavirusla əlaqəli iqtisadi çətinliklər səbəbindən proqramı gələcək 3 ildə 5% azaltmağı təklif edib. Sentyabr ayında Rusiya hökuməti təklifi təsdiqləyib.

Zümrüd